Sultan, nadale ni Butler sa WBO Bantamweight Title

ni GA - @Sports | April 25, 2022

Nabigong makamit ni Jonas “One Punch” Sultan ang pagkakataong maibulsa ang WBO interim bantamweight title nang yumuko kay hometown bet Paul “Baby Faced Assassin” Butler, Sabado nang madaling-araw (oras sa Pilipinas) sa M&S Bank Arena sa Liverpool, England.

Matapos humalili kay WBO 118-pound champion John Riel Casimero nang hindi payagan ng British Boxing Board of Control dahil sa paglabag sa pagsusuot ng sauna bago ang laban, tinangka ng 30-anyos mula Zamboanga City na si Sultan na lumapit sa world title, ngunit naungusan ni Butler nang paburan ng mga huradong sina Howard Foster (116-112), Fernando Laguna (117-111) at Manuel Oliver Palomo (118-111).

Dahil sa nakuhang panalo, maaaring hiranging pormal na kampeon sa mga susunod na araw o linggo si Butler sakaling bawian na ng titulo si Casimero. Ito na ang pangalawang pagkakataon na inindiyan ng three-division world titlist ang English boxer nang hindi ito sumipot sa weigh-in sa Dubai, UAE noong Disyembre 2021 kasunod ng naranasan umanong gastritis.

“It’s been a long journey,” wika ni Butler na dalawang beses nang nabigo sa World title fight laban kay Zolani Tete ng South Africa para sa IBF super-flyweight noong 2015 at kay Emmanuel Rodriguez ng Puerto Rico para sa bakanteng IBF 118-lb, kung saan overweight ito sa decision loss noong Mayo 2018.

“Dubai didn’t happen, Casimero didn’t happen again tonight but we had Sultan and for me he was a better opponent because he had beaten Casimero. We had 48 hours to make a game plan and that is what I can do in 48 hours. I had to stay switched on, but now and again I wanted to stand there just to let him know he couldn’t just push me around. But you win the easy way and the easy way for me tonight was moving my feet, making him miss and making him pay.”

Maagang inangkin ng 33-anyos mula Ellesmore Port, Cheshire, England ang laban nang magpamalas ito ng mabisang mga atake upang makaungos kay Sultan.