Start sa Enero 2023… CCP, isasara nang 3 taon para sa renovation

ni Lolet Abania | September 1, 2022

Isasara ang 53-anyos na gusali ng Cultural Center of the Philippines (CCP) ng dalawa hanggang tatlong taon simula Enero 1, 2023 para magbigay-daan sa renovation. Ito ang inanunsyo ni CCP President Margarita Moran-Floreindo sa ginanap na organizational briefing ng Senate Committee on Culture and the Arts ngayong Huwebes. “I would like to announce also, senator, that the CCP is closing its doors in January 2023 because we are now renovating the whole building and structural retrofitting,” pahayag ni Floreindo.

Ayon kay CCP Chairman Jaime Laya, tinatarget nilang bumalik sa CCP main building sa Marso 15, 2025. Umapela naman si Floreindo para sa dagdag na pondo na kailangan sa pag-upa o lease ng mga opisina na aalis mula main building. “We will need more funds than what we expected because we did not expect to move out and because when they started to open the little theater, they saw the structural retrofitting that are needed. So the whole staff are moving out of the building for next year,” saad ni Floreindo. Sa Nobyembre, mag-uumpisang bakantehin ang CCP main building para sa Enero ng susunod na taon ay masimulan agad ang renovation.

Ayon kay Floreindo, kahit na gagamitin nila ang corporate funds para sa lease ngayong taon, kakailanganin nila ang tinatayang P390 million additional funding para sa office at theater lease sa mga susunod na taon. Sa ilalim ng 2023 national expenditures program, sinabi ni Floreindo na ang budget lamang para sa konstruksyon ng main building ang nakasama rito.

“It (included in the NEP) but [it is] not enough because we did not know that we all have to move out all at the same time. It was supposed to be by floor,” ani Floreindo. Plano naman ng pamunuan ng CCP na magrenta ng isang space sa Design Center of the Philippines para sa kanilang Artistic Department habang ang mga Executive Offices ay lilipat sa Ramon Magsaysay Building. Base sa presentasyon ng CCP, humihiling din sila ng additional funds para sa lease ng performance venues at ang konstruksyon ng Liwasang Amphitheater.