St. Benilde naisahan ang Army. Angels hindi rin nagpadaig

ni Clyde Mariano @Sports | February 6, 2024

Pinalasap ng Saint Benilde sa Philippine Army ang pangalawang sunod na kabiguan at tinalo ang Lady Troopers sa makaubos-lakas na five sets, 3-2, (16-25, 25-16, 25-27, 25-14, 15-9) sa women’s division sa PNVF Champions League 2024 sa Rizal Memorial Coliseum.

Mahigitan ang laro ng dalawang koponan at kinuha ng back-to-back NCAA champion ang unang panalo sa deciding fifth set na tumagal ng mahigit dalawang oras.

“It’s hard-earned victory. We worked hard and utilized all available resources to win. It’s pretty good we made it. Hindi bumigay ang mga players ko at lumaban nang husto at gustong manalo,” sabi ni coach Jerry Yee.

Nagtulong sina middle blocker Zamantha Nolasco, wing spiker Wielyn Estoque at Gayle Jhasmin Pascual na umiskor ng tig-17 points at sina Jessa Dorog at Rhea Mae Densing ay nag-ambag ng tig- walong points sa pagdispatsa sa Army sa laro na tumagal ng 2  oras.

Umiskor ang Saint Benilde ng 70 points of 175 attempts at si Estoque ay 16 sa 37 spikes, Pascual 15 sa 42 spikes at Nolasco 13 sa 24 attempts.

Maraming errors ang Army at laging napapailing at napakamot sa ulo si Army coach Randy Fallorina tuwing nagkakamali ang kanyang mga players.

Ito ang pangalawang talo ng Army na unang natalo sa favorite Petrogazz Angels at nanganganib ang Lady Troopers na masibak sa five-team women division. Nanalo rin ang Cignal HD Spikers sa Chery Tiggo Crossovers.

“We have to win three games to enter the finals,” sabi ni coach Jerry Lee matapos talunin ng Saint Benilde ang Army.

Sisimulan ang eight-team men’s division sa February 11 maglalaban ang Cignal HD Spikers laban sa College of Saint Benilde, Philippine Navy versus Savouge Spin Doctors at VNS Asereth laban sa Iloilo D’ Navigators. Ang competition ay inorganisa ng PVNF at sinuportahan ng Philippine Sports Commission at Philippine Olympic Committee.