SSL: Lady Knights tinuhog Red Spikers, may next round pa

by Gerard Arce @Sports News | October 17, 2026

Photo: Matinding pag-spike ang pinakawalan ni Janelle Bachar ng San Beda Red Spikers kung saan ay hindi nagawang pigilan sa depensa ng katunggaling si Vanessa Sarie ng Letran sa Shakey's Super League Unity Cup sa Rizal Memorial Coliseum kahapon. Wagi sa straight sets ang Letran, 25-22, 25-14, 25-21. (Reymundo Nillama)

Mga laro ngayon:

(Rizal Memorial)

1 p.m. - FEU vs EAC 3

 p.m. - Ateneo vs SSC-R

5 p.m. - UP vs Lyceum 

Buhay pa sa kontensyon patungong playoffs ang Letran Lady Knights matapos tuhugin sa straight set ang San Beda Lady Red Spikers sa 25-22, 25-14, 25-21 sa Pool A match ng 2026 Shakey’s Super League (SSL) Unity Cup kahapon sa Rizal Memorial Coliseum.

Pinagbidahan ni Judiel Nitura ang atake ng Lady Knights  matapos itakda ang 7-0 birada upang muling mahawakan ang takbo ng laro tungo sa ikalawang panalo sa tatlong laro.

Umusad ang Letran sa solo second sa likod ng defending champion NU na nanatiling unbeaten sa 3-0 rekord. Umiskor si Nitura ng 7 sa third set, habang sinegundahan ito nina Kaizah Huyno at Gia Maquilang na kapwa may 8 marka na maaaring maiselyo ang silya patungong playoffs sakaling tibagin ang Perpetual Lady Altas sa Linggo.

“Sobrang laki ng panalo na ito for us kasi working kami as a team. Marami kaming bago and maraming nawalang seniors sa amin. So, kailangan din naming i-work talaga ang sarili namin and 'yung kabuuan ng team,” wika ni Nitura.

Nanguna para sa San Beda si Janelle Bachar sa 12 puntos mula lahat sa atake.