Spandau Ballet at Rey sa Classic Cup Division II

ni Green Lantern - @Renda at Latigo | March 24, 2022

HIindi binigo ni Spandau Ballet ang kanyang mga tagahanga matapos angkinin ang titulo sa 2022 PHILRACOM "Classic Cup Race" Division II na pinatakbo noong Linggo sa Santa Ana Park sa Naic, Cavite.

Kulelat sa largahan si Spandau Ballet na nirendahan ni Pabs Cabalejo habang nagtatagisan ng bilis sa unahan sina Flattering You na sinakyan ni class A rider Kelvin Abobo at Tocque Bell na ginabayan ni dating Philippine Sportswriters Association, (PSA) Jockey of the Year awardee Jonathan B. Hernandez.

Pagsapit ng far turn ay nasa unahan si Flattering You pero unti-unting lumapit sa kanya si Patong Patong na kumuha ng unahan papasok ng home turn.

Pero malakas ang dating ni Spandau Ballet kaya naagaw nito ang unahan sa huling 100 metro ng laban at manalo ito ng may dalawang kabayo ang agwat sa sumegundong Patong Patong.

Inirehistro ni Spandau Ballet ang tiyempong 1:55 minuto sa 1,800 meter race sa event na suportado ng Philippine Racing Commission, (PHILRACOM).

Hinamig ni Mark Ryan Ponce, may-ari ng Spandau Ballet ang P450,000 habang napunta ang P168,750 sa sumegundong si Patong Patong.

Terserong tumawid ng meta si Magtotobetsky habang si Tocque Bell ang pang-apat, kinubra nila ang tig-P93,750 at P37,500 ayon sa pagkakasunod.

Samantala, walong karera ang inihain ng Manila Jockey Club Inc. (MJCI) ngayong araw ng Huwebes, inaasahang aabangan ng mga karerista ang bakbakan ng walong kabayo sa 3-Year-Old & Above Maiden Race na pakakawalan sa San Lazaro Leisure Park sa Carmona, Cavite.

Inaasahang magdodomina sa bentahan sina Tinago Falls at Midship Bell sa distansyang 1,400 meter race. Ang ibang kalahok sa karera na nakalaan ang added prize na P10,000 para sa mananalo 3-year-old horse ay sina Platinum Bell, Believe In Me, Blue Thunder, Saoirse, Achi Holly at Gee's City.

Mga Pili ni Green Lantern:

Race 1. Hook N Dancer (8), Daldalero (1), Hi Jack (4)

Race 2. Wishful Thinking (3), Commodora (9), Rodrigo (7)

Race 3. Believe In Me (2), Midship Bell (7), Platinum Bell (1)

Race 4. Step Bell (3), Fortune Island (5), Money For Biffany (1)

Race 5. Dragon Butterfly (3), Lemonada (5), Tifosi (7)

Race 6. Senorita Bonita (8), Tomorrow Land (4), Case Bell (7)

Race 7. Habulin (12), Beyond D' Sea (2), Titanium (1)

Race 8. Jean Genie (10), Run And Gun (8), Amelia (13)