SONA NI PBBM, INISNAB NINA SEN. ROBIN AT VP SARA

ni Julie Bonifacio @Winner | July 29, 2025

Photo: Robin Padilla, PBBM at VP Sara - FB

Sinimplehan ang pagdaraos ng State of the Nation Address (SONA) ni Pangulong Bongbong Marcos sa Batasang Pambansa this year. Pero ‘di rin napigil ang pabonggahan ng suot ng mga mambabatas at kanilang mga asawa, lalo na ang mga kababaihan.

Unahin natin si Heart Evangelista na laging inaabangan ang white terno na isinusuot tuwing rumarampa sa Senate at Congress with her husband na nabotong muli bilang Senate President na si Francis “Chiz” Escudero.

Dalawang outfits both made by Michael Leyva ang isinuot ni Heart kahapon. 

Una ay ang barong top and woven Filipiniana skirt na suot niya na inilarawan ni Heart sa kanyang Instagram as “Perfection in Simplicity”  sa pagsumpang muli ni Chiz as Senate President.

Pagkatapos ay nagpalit na si Heart ng white long terno pagpasok ng House of Representatives kung saan ginanap ang SONA ni Pres. Marcos. 

Gawa naman ni Mark Bumgarner ang suot ni Department of Justice Undersecretary

Margarita Gutierrez.

Marami naman ang nagulat sa pagdating ni Miss Universe 2015 Pia Wurtzbach-Jauncey sa Congress wearing a modern white Filipiniana suit.

For sure, babatikusin si Pia ng mga bashers niya sa kanyang surprise appearance sa Congress at pagsasabungin na naman sila ni Heart ng mga netizens. 

Pero may katuturan ang pagdalo ni Pia sa SONA dahil siya ang bagong ambassadress ng Overseas Workers Welfare Administration (OWWA). Pinapunta at sinamahan siya sa Congress ni OWWA Chief Patricia Yvonne "PY" Caunan.

Samantala, sang-ayon si Sen. Francis “Kiko” Pangilinan sa utos ni Pres. Marcos na i-tone down ang mga handa sa SONA niya kahapon.

Say ni Sen. Kiko sa interbyu, “Dapat lahat ng SONA ganito… simple lang, ‘di ba?"

‘Di rin nakalampas na itanong kay Sen. Kiko kung nasaan ang kanyang misis na si Megastar Sharon Cuneta.

“Oh, she’s in uh… may inaasikaso. Saka,  tatlong dosena, dalawang dosenang SONA na ata ito (na ‘di dumadalo si Megastar),” ngiti ni Sen. Kiko.

No appearance rin sa SONA ang dating leading man ni Mega na si Sen. Robin Padilla, gayundin si Vice-President Sara Duterte na babalik pa lang ng bansa sa araw mismo ng SONA.

Tila nag-walkout naman ang kapatid ni VP Sara na si Paolo “Pulong” Duterte na congressman sa bayan nila sa Davao. 

Nakunan ng kamera si Paolo na palabas ng Congress nu’ng ‘di pa nagsisimula ang SONA ni Pres. Marcos.

Oh, well.

---

INALALA ni Mark Herras ang ika-11 taon ng kamatayan ng kanyang ama na si Claudio Herras, Jr. or Daddy Jun.

Ipinost ni Mark sa kanyang Instagram ang picture ng kanyang ama at isang madamdaming mensahe ang inilagay sa caption.

Nag-react ang mga netizens sa inilagay na statement ni Mark. Paano kasi ay pabirong sinabi ni Mark na nagpapasundo na siya kay Daddy Jun.

Mensahe ni Mark, “11 years in heaven dad.. love you dad thank you for everything na ginawa mo para sa ‘kin, ayaw mo pa ba akong sunduin? Hahaha! Enjoy lang po kayo d’yan kasama si Mama, Mamang & Papapim… Miss you, guys!💔😔”

Siyempre, huwag muna. Isa na ring ama si Mark ngayon sa 2 anak nila (Corky and Mija) ng misis niyang si Nicole Donesa, kaya alam niya ang feeling na ‘di kasama ng mga bata ang kanilang ama.

Saka, ang bata pa ni Mark para sumuko sa buhay. Marami pang mangyayari sa kanya. 

At maaaring isa d’yan ay ang pagsuporta niya sa kanyang kaibigan na si Jojo Mendrez na maglalabas ng bagong kanta under Star Music.