ni Gerard Arce - @Sports | August 18, 2022
Kultura, sistema, familiarity at growth, mga salitang mailalarawan sa Creamline Cool Smashers na matagumpay na nakuha ang back-to-back title at ika-5 titulo sa prangkisa na lumilikha ng bagong dynasty sa pangunguna ni league-MVP Diana Mae “Tots” Carlos.
Hindi lamang naipaghiganti ng Cool Smashers ang fifth set na pagkatalo sa semis kontra Taipei King Whale, bagkus ay winalis ang dayuhang koponan sa bisa ng straight set sa winner-take-all championship match para sa kampeonato matapos unang kunin ang titulo ng Open Conference noong Abril kontra naman sa Petro Gazz Angels.
“I think it’s mastering the culture of Creamline, yung sistema ni coach Sherwin. I think I played better because of the help of my coaches, my team mates, training every day, the help of the management and bosses. I’m really grateful with this team kase sobrang dami kong natutunan at yung growth sobrang tumaas talaga because of this team,” wika ng 24-anyos na dating UP Lady Maroons power hitter sa post-game interview matapos parangalan bilang Best Opposite Spiker.
Samantala, usapin sa estado ng Esports (Electronic Sports) ang sentro ng talakayan sa Tabloids Organization in Philippine Sports, Inc. (TOPS) ‘Usapang Sports’ ngayong Huwebes Behrouz Restaurant, 50 Sct. Tobias-Sct. Fernandez, Timog, Quezon City.
Inaasahang ilalahad ni Arniel Gutierrez, president ng Esports World Federation (ESWF) ang mga pinakabagong kaganapan sa Esports, programa at katayuan ng sports sa local at international community. Makakasama niya sa talakayan ng 10:30 ng umaga si Atty. Ronaldo Renta, Commissioner ng Philippine National Esports League (PNEL) para bigyan ng kasagutan ang mga isyu sa mga torneo at sa paglahok ng Pinoy esports masters sa international league. Kabilang din sa lingguhang sports forum na itinataguyod ng Philippine Sports Commission (PSC), Games and Amusement Board (GAB), Pagcor si Atty. Ermar Benitez, GAB Legal Chief at Officer-In-Charge.