SIM registration vs. scammers, kumakalat – NTC

ni Lolet Abania | January 7, 2023

Nagbabala ang National Telecommunications Commission (NTC) sa publiko hinggil sa mga scammers na nag-aalok ng tulong para sa registration ng SIM (Subscriber Identity Module) ng kanilang mga mobile phones.

Batay sa ulat, maraming indibidwal ang nag-aalok ng assistance kapalit ng pera para sa pag-register ng isang SIM.

“Kasi ‘pag nagbigay po tayo ng information doon makikita nila ‘yung name, address mo, pati ‘yung ID na iprepresenta mo ay baka po magamit nila sa kung saan-saan na hindi maganda po,” pahayag ni NTC deputy commissioner John Paolo Salvahan.

“Hindi natin sila ine-encourage because under the law SIM registration is free,” saad ni NTC regulation division director Imelda Walcien.

Ayon sa NTC, inatasan na nila ang mga telecommunications companies na magsagawa ng text blast upang bigyang babala ang mga subscribers hinggil sa nasabing isyu.

Sinabi ng Smart Communications na naglunsad sila ng touch points sa iba’t ibang bahagi ng bansa para makapagbigay ng assistance sa mga senior citizens, persons with disabilities, at mga residente na nasa malalayong lugar.

“Libre po ang pag-register at libre rin ang tulong na ibinibigay ng Smart, ng Smart stores, ng mga booth at touch points,” sabi ni first vice president at corporate communications group head ng Smart/PLDT na si Cathy Yang.

Habang ang Globe ay nag-release naman ng instructional video kung paano mag-register ng SIM.

“Search niyo lang ang YouTube, simple registration maraming pong vloggers d’yan na readily mag-a-assist sa registration, ituturo kung paano mag-register, maliban pa sa aming mga materials sa aming kanya-kanyang website,” ani Globe Telecom policy division head Ariel Tubayan.

Tiwala naman ang DITO Telecommunity Corporation sa kanilang system of registration.

“We are app-based so that is why because it is a unique security feature, you don’t need to go outside of that system,” wika ni chief administrative officer DITO Telecommunity Adel Tamano.

Nitong Biyernes, sinabi ng NTC na nasa mahigit 14 million SIMs ang nakapag-register na sa kani-kanilang service providers hanggang Enero 4, 2023, kung saan sinimulan ang proseso ng SIM registration noong huling linggo ng Disyembre ng nakaraang taon.

Ito ay binubuo ng walong porsiyento ng mahigit sa 168 million active SIM cards ng telcos.

Paalala naman ng NTC sa publiko na ang SIM registration ay hanggang sa Abril 25, 2023.

“We are looking at the challenges with regard to security and accessibility,” pahayag ni deputy commissioner, NTC officer-in-charge Ella Blanca.