SIM registration hanggang Abril 26 lang – DICT

ni Lolet Abania | January 12, 2023

Pinaalalahanan ng Department of Information and Communications Technology (DICT) ang publiko na ang SIM registration program ay tatagal lamang ng hanggang Abril 26, 2023.

Gayunman, babala ng DICT, ang mga SIM cards na hindi naka-register sa petsang ito ay made-deactivate.

Paalala din ng ahensiya, magpa-register lamang gamit ang mga sumusunod na official channels:

• SMART - smart.com.ph/simreg o simreg.smart.com.ph

• GLOBE - new.globe.com.ph/simreg

• DITO - https://digital.dito.ph/pto/download/app

Ayon sa DICT, base sa datos mula sa National Telecommunications Commission (NTC), hanggang noong Enero 10, mahigit sa 17 milyong SIMs ang naka-register na, kung saan kumakatawan sa 10.13 porsyento ng 169 milyong cellular subscribers sa buong bansa.

Ang Smart Communications Inc. (Smart) ay nai-report na may mahigit 8 million SIM cards ang nai-register, habang ang Globe Telecom, Inc. (Globe) ay tinatayang may 7.6 million SIM registrations, at ang Dito Telecommunity Corporation (DITO) ay mayroong 1.5 million SIMs.

Sinabi naman ng DICT na target nilang makapag-register ng nasa 1 milyong SIMs araw-araw, subalit posibleng magkaroon ng pagbagal habang dadami muli ang magpaparehistro kapag malapit na ang deadline.

Ayon pa sa ahensiya, para sa mga complaints at concerns kaugnay sa SIM Registration, maaaring tumawag sa DICT hotline 1326.