Si Jose Rizal at ang pagmamahal sa Diyos at sa bayan

ni Fr. Robert Reyes - @Kapaayapaan / Patakbo-takbo | June 20, 2022

Ipinanganak si Jose Rizal, ang ating pambansang bayani noong ika-19 ng Hunyo 1861 o 161 taon nang nakalilipas.

Naglaro, tumakbo, umakyat ng puno, namangha sa mga bagay-bagay sa kanyang kapaligiran, nagtanong sa kanyang nanay tungkol sa kung anu-ano, tulad ng gamo-gamo.

Ang lahat ng ito ay kanyang ginawa sa kanyang munting tahanan sa Calamba, Laguna. Tiyak na itinanong din ni Jose sa kanyang ina ang mga bagay tungkol sa Diyos at ang mga nangyayari sa loob at paligid ng simbahan. Tiyak na napag-usapan nina Jose at ng kanyang nanay tungkol sa mga prayleng may suot na itim na pangharap at puting abito.

Maraming hirap na pinagdaanan ang kanyang pamilya. Tiyak na napansin at naranasan ito ng batang Jose at dahil sa kanyang mapag-usisang kaisipan, napagkuwentuhan na rin niya ito sa kanyang mahal na ina, ama at sa kanyang paboritong kuya.

Lumaki ang batang Jose at sinikap ibigay ng kanyang mga magulang ang magandang edukasyon. Ipinadala ito sa Ateneo de Munisipal ng mga Heswita sa Sta. Ana, Manila.

Lalong nahasa sa kanyang pag-aaral ang matalas, matalim at malikhaing pag-iisip ng batang Rizal. Dito pinanday ang galing ni Rizal sa agham, kasaysayan, literatura at sining.

Sa kanyang murang-murang isipan naitanong ni Rizal kung paano nasangkot sina Padre Mariano Gomez, Jose Burgos at Jacinto Zamora sa marahas na aklasan. Malamang, tinanong din ng bata kung “talaga bang may kinalaman ang tatlong pari sa aklasan o isinangkot lang ang mga ito ng mga makapangyarihang Kastilang opisyal na hindi nagugustuhan ang mga sinasabi at ginagawa ng tatlong pari?”

Hindi naisulat ng batang Jose ang mga damdamin at kaisipang sumagi sa kanyang puso at isip sa mga sandaling ginagarote ang tatlong paring martir, ngunit maraming nagsabi na nag-iwan ito ng malalim na marka sa murang kamalayan ng bata.

Tatlong pari, mga alagad ng Diyos. Binitay dahil sa diumanong pagkakasangkot ng mga ito sa madugong aklasan sa Cavite.

Paano na ito, ang mga taong simbahan, alagad ng Diyos na sangkot sa aklasan laban sa Espanya ng mga taumbayan?

Sa Laguna, lalawigan ni Rizal nagtungo tayo ngayong linggo sa kaarawan ng ating bayaning martir upang pagpugayan ito sa kanyang mabunga, makabuluhan, mapaghamon at mapagpalayang buhay.