Sa Pebrero 1 at 25... Mga empleyadong magtatrabaho, may holiday pay — DOLE

ni Lolet Abania | January 30, 2022

Ipinaalala ng Department of Labor and Employment (DOLE) sa mga employers ngayong Linggo na ang mga empleyado na magre-report sa kanilang trabaho sa mga itinakdang special non-working days nitong Pebrero ay nararapat na makatanggap ng kanilang premier pay.

Ayon sa DOLE, ang mga manggagawa na magtatrabaho sa Pebrero 1 o Chinese New Year at Pebrero 25 o EDSA People Power Revolution Anniversary ay dapat na bayaran ng karagdagang 30% ng kanilang basic wage.

“The additional pay will reflect the computation of the basic wage multiplied by 130%, on top of the cost of living allowance,” pahayag ng DOLE.

Ang mga manggagawa na papasok bilang overtime ay babayaran ng karagdagang 30% ng kanilang hourly rate sa naturang mga mga araw, habang ang mga magre-report ng holidays kahit na kanilang rest day ay dapat na bayaran ng karagdagang 50% sa unang walong oras ng kanilang trabaho.

Ang mga magtatrabaho bilang overtime ng kanilang dayoff ay dapat ding bayaran ng karagdagang 30% ng kanilang hourly rate.

“For employees who did not work, the ‘no work, no pay’ principle shall apply unless there is a favorable company policy, or collective bargaining agreement granting payment on a special day,” paliwanag ng DOLE.

Naunang inanunsiyo ng Malacañang na ang Pebrero 1 at Pebrero 25 ay special non-working days, base sa deklarasyon na nilagdaan ni Pangulong Rodrigo Duterte noong Oktubre 29, 2021.