Robertson ng UCFC, nanggitla; 'Pinas 'di nakabawi sa Malaysia

ni Anthony E. Servinio - @Sports | March 26, 2022

Kung gagamiting batayan ang unang laro, maliwanag ang susunod na kabanata ng United City Football Club matapos gibain ang Maharlika FC Manila, 4-0, sa 2022 Copa Paulino Alcantara sa PFF National Training Center sa Carmona, Cavite Huwebes ng gabi. Agad naglabas ng husay ang mga bagong-pirmang manlalaro matapos lumiban ang koponan sa 2021 edisyon ng torneo.

Nagpakilala agad si defender Alan “JJ” Robertson at inulo niya papasok ang bola sa ika-23 minuto buhat sa corner kick. Hindi nagpahuli si dating Dynamic Herb Cebu FC Ricardo Sendra sa ika-27 minuto at tumanggap ng magandang pasa sa kapwa-baguhan Simen Lyngbo upang madoble ang lamang.

Hindi nagpreno ang Maharlika at nahanap ni Ivan Ouano ang 3rd goal sa ika-44 minuto buhat sa pasa ni Curt Dizon para umakyat sa 3-0 ang talaan sa halftime. Kahit komportable ang lamang, nakahabol ng isa pang goal si Hikaru Minegishi sa ika-73 sa tulong ni Dean Ebarle.

Samantala, pinalasap ng Malaysia ang mapait na 2-0 talo sa Pilipinas sa kanilang FIFA Friendly noong Miyerkules sa Singapore National Stadium. Sapat ang dalawang maagang goal ni forward Akhyar Rashid sa ikatlo at ika-24 na minuto at ginawa ng Azkals ang lahat para makabawi subalit kinapos.