P170/kg presyo ng pulang sibuyas — DA

ni Lolet Abania | October 10, 2022

Naglabas ang Department of Agriculture (DA) ngayong Lunes ng isang suggested retail price (SRP) para sa pulang sibuyas sa mga wet markets sa Metro Manila, matapos ang pagtaas sa presyo ng mga produktong agrikultural.

Base sa Administrative Circular 09 na may petsang October 7, 2022, itinakda ni DA Senior Undersecretary Domingo Panganiban ang SRP ng P170 kada kilogram ng pulang sibuyas o red onions sa mga palengke sa National Capital Region (NCR).

“[I]n order not to aggravate the current difficulties of the Filipino people affected by the pandemic and rising fuel prices, there is a need to guide the consuming public on the reasonable prices of basic necessities in the market,” batay sa circular.

Sa pinakabagong datos mula sa DA, lumabas na ang presyo ng lokal na pulang sibuyas sa Metro Manila markets ay nag-a-average ng P200 kada kilogram hanggang nitong Biyernes, Oktubre 7, 2022.

Gayundin, ang inflation ay umabot ng 6.9% nitong Setyembre, dulot ng mga presyo ng pagkain at non-alcoholic beverages, kung saan tumaas ng 7.4% sa naturang buwan.

Inaasahan naman ng Department of Finance (DOF) at ng Philippine Statistics Authority (PSA) na ang inflation ay mananatiling mataas sa mga natitirang buwan ng taon dahil sa mahinang halaga ng piso at ang pinsalang dulot ng Bagyong Karding.

Patuloy naman ang pagbangon ng agricultural sector mula sa Bagyong Karding, kung saan nag-iwan ng P3 bilyong halaga ng pinsala at pagkalugi sa naturang sektor.