Publiko, ‘di maiiwasang magduda sa executive session sa ICI

by Info @Editorial | November 28, 2025

Sa gitna ng nagpapatuloy na imbestigasyon sa flood control scandal, sinabi naman ng Independent Commission for Infrastructure (ICI) na malinaw ang kanilang guidelines hinggil sa livestreaming ng mga pagdinig.Bilang pangkalahatang patakaran, dapat ay naka-livestream ang hearings, maliban na lamang kung hihiling ang isang resource person ng executive session na may sapat na legal at makatotohanang basehan.

Matatandaang dalawang kongresista ang humiling na ibahagi ang kanilang testimonya sa executive session. Iginiit nila na may sensitibo at pribadong impormasyong maaaring mailahad sa kanilang salaysay.

Tiniyak naman ng ICI na naaayon sa batas at sa kanilang patakaran ang pagkuha ng testimonya sa executive session, kung ito ang hiling ng resource person.Gayunman, may mga nadismaya at ‘di napigilang umalma. 

Anila, kung nais ng ICI na makuha ang tiwala ng publiko sa ginagawang pag-iimbestiga, dapat itong gawin nang bukas sa madla. 

Kahit saan pa ito humantong, sa pagtatapos, ang tanong ay hindi kung may karapatan ba silang magsagawa ng executive session kundi ginamit ba nila ito dahil kinakailangan o dahil nakakatulong ito sa kanila? At habang hindi pa ito nasasagot, mananatiling mabigat ang agam-agam ng publiko.