Proteksyon ng mga bata vs. online sexual abuse, bilisan!

ni Ryan Sison - @Boses | May 27, 2022

Sa gitna ng pamamayagpag ng internet, buhay na buhay din ang mga krimen.

Iba’t ibang scam at modus ang nauso, kabilang na rito ang pananamantala sa mga menor-de-edad sa pamamagitan ng pagbabahagi o pagpapakalat ng malalaswang larawan o video ng mga ito sa internet.

Kaugnay nito, inaasahang maisasabatas ang Online Sexual Abuse and Exploitation of Children Act (OSAEC) na magpaparusa sa mga taong masasangkot sa pananamantala sa mga musmos gamit ang internet.

Ito ay matapos ratipikahan ng Senado at Kamara ang bicameral conference report sa pinag-isang bersyon ng dalawang Kapulungan ng Kongreso.

Sakop ng batas ang tungkulin ng ilang pribadong sektor, partikular ang electronic service providers, internet intermediaries at financial intermediaries na i-block at ipreserba ang OSAEC materials na matatagpuan sa kanilang platform, gayundin ang kooperasyon sa mga kinauukulan.

Binigyang-diin ng ilang mambabatas na ang pamamayagpag ng internet, mobile apps, electronic payments, gayundin ang online games ang nakadagdag sa pagtaas ng kaso ng exploitation ng mga bata.

Gayundin, kadalasan umanong mga sangkot ay mga kaanak at kapitbahay ng biktima, habang ang iba naman ay sindikato.

Sa totoo lang, napapanahon ang pagpapatupad ng naturang batas dahil sa patuloy na pagtaas ng kaso ng mga kabataang nakararanas ng pang-aabuso.

At sa pamamagitan ng batas, hangad nating matuldukan na ang krimeng ito at mapanagot ang mga dapat managot. Hangad din natin ang kooperasyon ng mga pribadong sektor para sa proteksyon ng mga bata.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com