Private schools, tuloy lang sa blended learning — DepEd

ni Lolet Abania | October 17, 2022

Ipinagkaloob sa mga private schools ang option na ipagpatuloy ang pagpapatupad ng blended learning modality, ang kumbinasyon ng face-to-face classes at distance learning, para sa natitirang School Year 2022-2023, ayon sa order na inilabas ng Department of Education (DepEd) ngayong Lunes.

Base sa DepEd Order (DO) No. 44, series of 2022, na nilagdaan ni Vice President at DepEd Secretary Sara Duterte, ang mga pribadong paaralan ay maaaring nang magsagawa alinman sa 5-araw na face-to-face classes, blended learning modality, o ang full distance learning simula Nobyembre 2.

Binanggit ng DepEd na sakaling pinili ng mga private institutions ang blended learning method, maaari nilang ituloy ang in-person classes ng 3 araw at 2 araw naman ng distance learning sa pamamagitan ng modular, online, o television o radio-based instruction.

Pagkatapos nito, maaari nilang ipatupad ang 4 na araw na in-person classes at isang araw na distance learning.

Ayon sa DepEd, sa pagkakaloob ng nasabing option, ikinonsidera nila ang kasalukuyang sitwasyon ng mga private schools na idinulot ng COVID-19 pandemic.

“DepEd is cognizant of the current situation of the private sector due to the impact of the COVID-19 pandemic -- the amount of investment in online learning technologies, the development and institutionalization of best practices on blended learning, and the unfortunate closure of small private schools because of losses,” ani ahensiya sa isang statement.

Sinabi naman ng DepEd na ipauubaya na nila ang usapin kung anong learning modality ang ipatutupad ng mga private education institutions sa mga paaralan, ng mga parents o guardians, at mismong mga learners.

Subalit, iginiit ng ahensiya ang kahalagahan ng in-person classes, ito ay isang anila, “undisputable fact,” base sa mga pag-aaral at nananatili pa rin na “best option for basic education.”

“[DepEd] maintains its confidence in the benefits of holding in-person classes to promote academic development and the overall mental health and well-being of our learners,” saad ng DepEd.

“DepEd, however, hopes that parents/guardians of private school learners would not miss the abundance of scientific studies available on the advantages of in-person classes over online learning,” dagdag pa ng ahensiya.

Kaugnay nito, ang kasalukuyang academic year ay nagpapatupad ng kumbinasyon ng in-person classes at distance learning simula noong Agosto 22.

Bago inilabas ang DO 44, parehong ang public at private schools ay required na magsagawa ng transition na 5-araw na face-to-face classes simula Nobyembre 2.