Pramis ni Romualdez.. Teves, safe ‘pag umuwi ng ‘Pinas

ni Mylene Alfonso | March 17, 2023

“Umuwi ka na, kami ang bahala sa iyong kaligtasan.” Ito ang tiniyak kahapon ni House Speaker Martin Romualdez kay Negros Oriental Cong. Arnolfo Teves, kasunod ng patuloy na pagtanggi nitong umuwi na sa bansa dahil sa pangamba sa kanyang kaligtasan.

Ayon kay Romualdez, nang makausap niya sa telepono si Teves ay pinaalalahanan niya ito na walang mangyayari kung hindi niya haharapin ang mga alegasyong ibinabato sa kanya kaugnay ng pagpatay kay Negros Oriental Gov. Roel Degamo kamakailan.

Sinabihan umano niya si Teves na liliit lamang ang kanyang mundo kung hindi pa rin siya uuwi sa bansa.

Nabatid na Marso 9 ang huling araw ng leave o bakasyon ni Teves, base na rin sa travel clearance na isinumite nito sa Kongreso.

Kaya naman, sinimulan na ng House Ethics Committee ang pagdinig kung kailangan na bang patalsikin sa Kongreso o suspendihin muna ang naturang mambabatas dahil sa hindi pagsunod sa utos ni Speaker Romualdez na umuwi sa bansa.