Power supply, naibalik na… Tents, ipinadala sa mga residenteng apektado ng lindol sa Abra – P-BBM

ni Lolet Abania | October 26, 2022

Ipinahayag ni Pangulong Ferdinand “Bongbong” Marcos Jr. na kanyang mino-monitor ang sitwasyon sa ilang mga probinsiya sa Northern Luzon matapos ang naitalang magnitude 6.4 na lindol na tumama sa Abra nitong Martes ng gabi.

Sa interview ng mga reporters ngayong Miyerkules, sinabi ni Pangulong Marcos na ang mga apektadong pamilya ay humingi na ng mga tents para itayo sa labas dahil sa natatakot silang bumalik sa loob ng kanilang bahay na posibleng magkaroon ng aftershocks.

Ayon din sa Pangulo, ang suplay ng kuryente sa Ilocos Norte, Ilocos Sur, at ilang mga lugar sa Abra ay naibalik na.

“The epicenter was lower down. Hindi kagaya noong nasa Abra. Pero doon na sa amin sa Ilocos Sur, Ilocos Norte. But in our place, schools are closed for the day hangga’t matiyak na lahat ng mga school building ay safe para sa mga bata. So, that was the first concern,” saad ni P-BBM.

“The other concern right now is to make sure that power [is restored]. ‘Yung Ilocos Norte, the power is back. Ilocos Sur, the power has come back. I’m waiting for the report from Abra. I think parts, the last I heard, the last parts of the – of Abra province power has already been restored,” dagdag ng Pangulo.

“So we have sent… Ang hinihingi ng karamihan ay tents. And the reason why is ayaw nilang -- natakot silang bumalik sa bahay nila baka mag-aftershock tapos mahina ‘yung bahay, baka masaktan sila,” sabi ng Chief Executive.

Hindi naman binanggit ni Pangulong Marcos kung bibisitahin niya ang mga lugar na apektado ng lindol.

Sa hiwalay na tweet, sinabi ni P-BBM na patuloy siyang nakikipag-ugnayan sa Department of Public Works and Highways (DPWH) para sa inspeksyon ng mga gusali at lansangan, sa Department of Social Welfare and Development (DSWD) para sa relief operation, sa Department of Energy (DOE) para sa outages, at sa Department of the Interior and Local Government (DILG) para sa monitoring ng sitwasyon sa naturang lugar.