Pondo sa eleksyon.. Kandidato, buking sa kidnap-holdap

ni BRT @News | September 14, 2023

Timbog ang isang kandidato sa Barangay elections sa Biñan City, Laguna makaraang masangkot sa kidnapping at panghoholdap.

Batay sa imbestigasyon, lumilikom umano ng pondo para sa eleksyon ang nahuling kandidato kaya nagawa ang krimen.

Una nang pinasok ng suspek kasama ang iba pang salarin ang isang hotel sa Bgy. San Antonio at dinukot ang biktimang negosyante at kasama nito.

Nagpakilala umanong pulis ang mga suspek at may dala pang mga ilegal na droga para taniman at takutin ang kanilang biktima. Aabot umano sa P1.8 milyon na halaga ng

pera, alahas, at gadget ang natangay sa mga biktima na iniwan din sa isang lugar.

Agad namang naitawag ng hotel staff sa Biñan PNP ang insidente at nagulat umano sila dahil wala namang police operation nu'ng mga oras na 'yun.

Kabilang sa mga suspek sina Arvin Ryan Alora, kandidato sa Barangay elections, at Art Berroya na positibong kinilala ng mga biktima.

"Tingin natin at according du'n sa kanilang chat, siguro ito para makatulong sa pagtakbo nitong tumatakbong kagawad na ito dahil kailangan niya ng pera, according du'n sa usapan at tinitira lang nila mga bigtime," ani Col. Virgilio Jopia, hepe ng Biñan police.

Aminado si Alora na kasama sa grupo pero itinanggi niyang siya ang lider nito at para sa pondo ngayong eleksyon ang motibo sa krimen. Tumanggi namang magbigay ng pahayag si Berroya.

Samantala, patuloy na pinaghahanap ang iba pang kasabwat ng mga suspek