PNR, extended ang operating hours

ni Lolet Abania | November 30, 2022

Pinalawig ng Philippine National Railways (PNR) ang kanilang operating hours sa mga ruta sa Metro Manila bilang antisipasyon sa holiday rush.

Sa extended operating hours ng PNR, aalis ang first train ng Tutuban ng alas-4:11 ng madaling-araw, habang ang last train ay aalis naman ng Tutuban ng alas-9:16 ng gabi.

May karagdagang train trips na rin ang PNR: Tutuban patungong San Pedro, 8:16PM; San Pedro patungong Tutuban, 4:50AM; Sucat patungong Tutuban, 5:01AM.

Ayon sa PNR, tinatayang nasa 44 hanggang 50 ang kanilang daily trips habang madadagdagan ito ng 55 hanggang 60 dahil sa extended operating hours.

Nakapag-record na rin ang PNR ng 17% pagtaas sa ridership boarding sa Tutuban station sa panahon ng holiday season noong 2019.