Pinuri na natural ang beauty… XYRIEL, PROUD NA RETOKADO ANG ILONG

ni Vinia Vivar @Frankly Speaking | October 31, 2025

Photo: Xyriel Manabat

Diretsong sinagot ni Xyriel Manabat ang isang netizen na pinuri-puri ang ganda niya dahil wala siyang retoke.

Nag-post kasi ang aktres ng kanyang mga larawan habang nasa isang lake siya na may caption na, “Fresh air therapy.”

Pinusuan ng maraming netizens ang nasabing post at dinagsa rin ng reaksiyon ang comments section. 

Halos lahat ay puring-puri ang beauty ng dating child actress.

Isang netizen ang nagkomento ng “Pure beauty, no retoke. Sharawwwt (shout out), Team Raht-bo.”

Kinontra agad ni Xyriel ang sinabi ng netizen at naging honest sa pag-aming nagpa-nose job siya.

“Retokada po ilong ko,” tugon ng aktres.

Sumagot naman ang netizen at sinabing, “Ay, sorry naman, ‘di ko kasi hilig mangalkal ng issue. Hahaha!”

Nag-reply ulit si Xyriel at aniya, “It’s okay, compliment po ‘yan for me. LABYU (I love you). HAHAHAHAHA, THANKS.”

In fairness, hindi naman ikinakahiya talaga ng aktres na nagparetoke siya ng ilong. Inamin niya ito noon pa sa isa sa kanyang mga posts at ayon sa kanya, “It’s something to be proud of, I’m being honest and transparent.”

---

MULI na ngang nagbukas ang Bahay ni Kuya at this time, Gen Z housemates mula sa Sparkle GMA Artist Center at Star Magic ang pumasok last Saturday night. Una nang ipinakilala sina Sofia Pablo, Princess Aliyah, Heath Jornales, at Marco Masa mula sa Sparkle, at sina Joaquin Arce, Miguel Vergara, Krystal Mejes, at Carmelle Collado ng Star Magic noong nakaraang Linggo sa 24-Oras.

Sunud-sunod na ring pumasok sa bahay sina Anton Vinzon, John Clifford, Waynona Collings, Caprice Cayetano, Lee Victor, Ashley Sarmiento, Eliza Borromeo, Rave Victoria, Iñigo Jose, Lella Ford, Reich Alim, at Fred Moser na kumumpleto sa 20 kabataang Pinoy na susubok sa hamon ng buhay sa loob ng Bahay ni Kuya. 

In fairness sa mga bagets na ito, handang-handa na rin talaga ang mga fans nila dahil trending ang mga ito sa social media.

Samantala, muling nagbabalik ang Pambansang Host ni Kuya na si Luis Manzano bilang isa sa mga hosts ng Pinoy Big Brother Celebrity Collab Edition (PBBCCE) 2.0. Marami ang nakihula sa OG host at natuwa ang mga netizens nang si Luis nga ang nagbabalik-bahay.

Ano nga kaya ang magiging tasks ng mga housemates? Sinu-sino ang makakabuo ng pagkakaibigan ngayong season? 

Abangan ‘yan gabi-gabi, 9:10 PM sa GMA Prime.

---

TAOS-PUSONG nagpasalamat sa manonood ang What Lies Beneath (WLB) matapos itong makapagtala ng bagong all-time high viewership record na 530,015 peak concurrent viewers sa episode nito noong Lunes (Oktubre 27) nang abangan ng mga ito ang mga sikreto sa buhay ng Mabels.

Bukod sa mataas na viewership record, nananatili rin itong most-watched series sa Netflix Philippines at patuloy na trending sa social media.

Sa naturang episode, sinubaybayan ng manonood ang totoong rason sa likod ng mag-asawang sina Mel (Sue Ramirez) at Anton (Jameson Blake). Nalaman ng mga viewers na nabaligtad si Mel at ang tunay na nananakit ay si Anton. Gusto mang hiwalayan ni Mel ang asawa ay binantaan siya nito na mawawala sa kanya ang kanyang nabuong karera kapag itinuloy niya ang balak na makipag-divorce.

Sa kabilang banda, napilit ni Beth (Charlie Dizon) si Alice (Janella Salvador) na sabihin ang tunay na rason kung bakit siya aligaga at sobrang takot sa seguridad ng anak. 

Inamin ni Alice na nakipaghiwalay na siya sa asawa at gusto lang niyang makasigurado na hindi makukuha nito ang anak niya.

Napapanood ang WLB tuwing weeknights simula 8:45 PM sa Kapamilya Channel, A2Z, TV5, TFC, at Kapamilya Online Live sa YouTube (YT) channel at Facebook (FB) page ng ABS-CBN Entertainment. Puwede rin itong mapanood in advance sa Netflix at iWant.