Pinoy Magsayo, abangan sa undercard ng ugas-Pacman

ni Gerard Arce - @Sports | August 22, 2021

Isang napakahalagang laban para kay undefeated Filipino featherweight challenger Mark “Magnifico” Magsayo ang kailangang malampasan laban kay dating WBC interim super-bantamweight champion Julio “Polito” Ceja ng Mexico dahil magsisilbi itong featherweight elimination sa WBC titlist na si Gary Russell Jr.

Tumimbang sa 125.5-lbs ang 26-anyos na Filipino undefeated boxer na tubong Tagbilaran, Bohol habang sumampa naman sa 125-lbs ang 28-anyos na dating WBC Silver 118-pound titlist bilang undercard bout ng Pacman-Ugas fight.

Nakapuwesto bilang ika-5th sa rankings ng WBC ng beterano at 6-year title holder na si Russel Jr., 4th sa IBF title ni British Kid Galahad at 3rd sa WBO belt ni Emmanuel Navarete, si Magsayo (22-0, 15KOs), habang nasa 12th ranked naman ang knockout artists na si Ceja (32-4-1, 28KOs) bilang featherweight contender. Sakaling manaig ang co-promoted ng MP Promotions at Premier Boxing Champions (PBC) na si Magsayo, maaaring makatapat nito ang matagal ng inaasam na laban sa 33-anyos na long-time American WBC champion na si Russell Jr. (31-1, 18KOs) simula 2015-hanggang sa kasalukuyan.

Matagal ng pangarap ni Magsayo na magwagi ng kampeonato at sa pagkakataong ito ay pipilitin niyang makatuntong sa inaasam na world title fight sakaling mapataob ang Mehikanong katunggali na minsan ng tinalo nina dating lineal bantamweight titlist Guillermo Rigondeaux ng Cuba, Franklin Manzanilla ng Venezuela at kababayang si Hugo Ruiz. Ang 'Pacquiao vs. Ugas: The Legend vs. The Olympian' ay isasaere ng 11 a.m. sa GMA Network katuwang ang TAP Digital Media Ventures Corp. at may replay ng 10:30 p.m.

“If I win this fight, my dream is to become a world champion, if I win this fight, I’m sure I’m gonna win this fight,” wika ni Magsayo. “I’m gonna put may all best in this fight and I’m sure we’re gonna win this fight.”

Determinado naman ang dating WBC Silver bantamweight na dalawang beses ng nagpapatumba ng mga Filipino boxers sa katauhan nina Ranel Suco (10th round) at Lionel Mark Duran (5th round), na maisasama niya sa listahan ng kanyang tinalo ang bagong alaga ni Hall of Famer trainer Freddie Roach.