Pinatay ng amo sa Lebanon... Mga labi ng 2 OFW na iniuwi ng 'Pinas, nagpalit

ni Jeff Tumbado @News | June 15, 2026

Photo: DMW

Inako ng Department of Migrant Workers (DMW) ang responsibilidad sa naganap na pagkakapalit ng mga labi ng dalawang overseas Filipino workers (OFWs) na nasawi sa Beirut, Lebanon, at humingi ng paumanhin sa mga naulilang pamilya na naapektuhan ng insidente.

Tiniyak ng ahensya na sasagutin nito ang lahat ng gastusin kaugnay ng muling pagproseso at pagpapadala ng mga labi upang maihatid ang mga ito sa tamang pamilya.

Nagsasagawa rin umano ng masusing imbestigasyon upang matukoy kung paano naganap ang pagkakamali at upang maiwasan itong maulit sa hinaharap.

Ang dalawang OFW ay nasawi sa Beirut noong Abril 15 matapos umanong i-hostage at barilin ng kanilang employer.

Nakabalik na sa Pilipinas ang mga labi ng dalawang OFW, subalit nadiskubre ng kanilang mga kaanak na nagkaroon ng pagkakapalit sa pagkakakilanlan ng mga ito.

Samantala, patuloy na hinihintay ng mga pamilya ang hustisya para sa pagkamatay ng dalawang OFW, habang nagpapatuloy ang imbestigasyon ng mga awtoridad sa Lebanon laban sa employer na sangkot sa krimen.