Pinapayagan lang ng batas pagtalikod sa parental authority sa kaso ng pag-aampon

ni Atty. Persida Rueda-Acosta @Magtanong Kay Attorney | September 5, 2025

Dear Chief Acosta,

Ako na ang tumayong ina sa aking pamangkin simula nang siya ay isang taong gulang pa lamang. Yumao na ang kanyang tatay. May sarili namang pamilya at wala nang pakialam ang aking kapatid. Sa katunayan, handa siyang talikuran ang kanyang pagiging nanay sa bata. Para maging pormal ang lahat at kailanman ay hindi na niya mababawi ang kanyang anak, maaari bang gawin ito sa isang kasunduan na lamang? -- Cordelia

---

Dear Cordelia,

Alinsunod sa likas na karapatan at tungkulin ng mga magulang sa kanilang mga anak, kabilang sa awtoridad at responsibilidad ng magulang ang pangangalaga at pagpapalaki sa kanila para sa kamalayan, kahusayan, at pagpapaunlad ng kanilang moral, mental at pisikal na katangian at kagalingan.

Kaugnay nito, malinaw na nakasaad sa ating Family Code of the Philippines na hindi maaaring ialis, talikuran o ilipat ang awtoridad at responsibilidad ng magulang, maliban sa mga kaso na pinahihintulutan ng batas:

“Art. 210. Parental authority and responsibility may not be renounced or transferred except in the cases authorized by law.”

Sang-ayon dito, sa kasong Dinah B. Tonog vs. Court of Appeals and Edgar V. Daguimol, G.R. No. 122906, 07 Pebrero 2002, sa panulat ni Honorable Associate Justice Sabino R. De Leon, Jr., ipinahayag ng ating Kagalang-galang na Korte Suprema na pinapayagan lamang ng ating batas ang pagtalikod o pagwawaksi ng awtoridad ng magulang o parental authority sa mga kaso lamang ng pag-aampon o adoption, guardianship, at pagsuko nito sa mga institusyong nangangalaga sa mga naulila: 

“In turn, the parents’ right to custody over their children is enshrined in law. Article 220 of the Family Code thus provides that parents and individuals exercising parental authority over their unemancipated children are entitled, among other rights, “to keep them in their company.” In legal contemplation, the true nature of the parent-child relationship encompasses much more than the implication of ascendancy of one and obedience by the other. We explained this in Santos, Sr. v. Court of Appeals:

The right of custody accorded to parents springs from the exercise of parental authority. Parental authority or patria potestas in Roman Law is the juridical institution whereby parents rightfully assume control and protection of their unemancipated children to the extent required by the latter’s needs. It is a mass of rights and obligations which the law grants to parents for the purpose of the children’s physical preservation and development, as well as the cultivation of their intellect and the education of their heart and senses. As regards parental authority, “there is no power, but a task; no complex of rights, but a sum of duties; no sovereignty but a sacred trust for the welfare of the minor.”

Parental authority and responsibility are inalienable and may not be transferred or renounced except in cases authorized by law. The right attached to parental authority, being purely personal, the law allows a waiver of parental authority only in cases of adoption, guardianship and surrender to a children’s home or an orphan institution. When a parent entrusts the custody of a minor to another, such as a friend or godfather, even in a document, what is given is merely temporary custody and it does not constitute a renunciation of parental authority. Even if a definite renunciation is manifest, the law still disallows the same.” 

Kung kaya, kapag ipinagkatiwala ng isang magulang ang kustodiya ng bata sa ibang tao, kahit pa nakapaloob ito sa isang dokumento, hindi ito bumubuo ng pagtalikod sa parental authority dahil hindi ito pinapayagan ng ating batas. 

Samakatuwid, kahit pa may kasunduan o kasulatan sa pagitan ninyong magkapatid, hindi pa rin maiaalis ang karapatan ng iyong kapatid sa kanyang anak. Sa madaling salita, ang pagsagawa ng nasabing dokumento ay hindi nangangahulugan na tinalikdan ng iyong kapatid ang kanyang parental authority sa kanyang anak.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.