Pinakamahal na kuryente, malaking kapalpakan sa sistema

by Info @Editorial | July 22, 2026

Hindi na katanggap-tanggap na ang Pilipinas ang may pinakamahal na singil sa kuryente sa ASEAN habang milyun-milyong Pilipino ang patuloy na nagtitipid para lamang makaraos sa araw-araw. 

Bawat pagtaas ng electric bill ay hindi lang dagdag-gastos sa bahay, kundi dagdag-pasanin din sa mga negosyong lumilikha ng trabaho at sa ekonomiyang dapat sana'y lumalago. 

Kung mataas ang presyo ng kuryente, mataas din ang presyo ng halos lahat ng bilihin.

Mas nakababahala dahil ang mahal na kuryente ay hindi lamang usapin ng pandaigdigang presyo ng langis o krisis sa suplay. Isa rin itong salamin ng matagal nang suliranin sa sektor ng enerhiya—kulang na kompetisyon, mabagal na pagpapatayo ng mga bagong planta, mataas na buwis at singilin, at kakulangan sa pangmatagalang plano upang mapababa ang gastos sa produksyon ng kuryente. 

Habang ang mga karatig-bansa ay naghahanap ng mas mura at mas episyenteng pinagkukunan ng enerhiya, tila naiipit ang Pilipinas sa paulit-ulit na problema.

Ang epekto nito ay ramdam mula sa pinakamaliit na tindahan hanggang sa pinakamalalaking industriya. Nawawalan ng kakayahang makipagsabayan ang mga negosyo dahil sa mataas na gastos sa operasyon, habang ang mga mamumuhunan ay nagdadalawang-isip na maglagak ng kapital sa isang bansang mahal ang kuryente. 

Sa huli, ang ordinaryong mamamayan pa rin ang nagbabayad—sa pamamagitan ng mataas na presyo ng bilihin, limitadong oportunidad sa trabaho, at mas mababang kalidad ng pamumuhay.

Panahon nang gawing pangunahing prayoridad ang tunay na reporma sa sektor ng enerhiya. Hindi sapat ang pansamantalang solusyon o paunti-unting bawas-singil.

Kailangan ng malinaw na polisiya na magpapalakas ng kompetisyon, magpapabilis sa pagpasok ng mas murang pinagkukunan ng enerhiya, at magtitiyak na patas ang bawat sentimong sinisingil sa mga konsyumer.