Pilot site ng Register Anywhere Project, dinagdagan – Comelec

ni Lolet Abania | December 11, 2022

Mas marami pang sites ang idinagdag para sa pilot testing ng Register Anywhere Project (RAP), ayon sa Commission on Elections (Comelec).

Ang mga karagdagang pilot sites ay inilagay sa Robinson’s Mall Tacloban, Barangay Baras Baras, Tacloban City; SM City Legazpi, Imelda Roces Avenue, Zone 9, Barangay 37 Bitano, Legazpi City, Albay; at Robinson’s Mall Naga, Naga City, Camarines Sur.

Una nang inanunsiyo ng Comelec na maglalatag sila ng mga pilot sites ng RAP sa limang piling malls sa National Capital Region (NCR), kabilang dito ang SM Mall of Asia sa Pasay City, SM Fairview sa Quezon City, SM Southmall sa Las Piñas City, Robinson’s Place Manila, at Robinson’s Galleria sa Quezon City sa Disyembre 17.

Ayon kay Comelec Spokesperson John Rex Laudiangco, ang nasabing proyekto ay isasagawa tuwing Sabado at Linggo mula Disyembre 17 hanggang Enero 22, 2023.

Wala namang gaganaping registration sa Disyembre 24, 25, 31, 2022 at Enero 1, 2023.

Sinabi ni Laudiangco, “RAP will also be conducted in government sites such as Senate of the Philippines in Pasay City on January 25, 2023; House of Representatives in Quezon City with exact dates to be determined, and Government Service Insurance System (GSIS) Main Office in Pasay City with exact dates to be determined.”

Aniya, ang mga aplikante ay dapat na magsumite ng kanilang application form, documentary requirements, habang ang kanilang biometrics ay gagawin on-site.

Ang mga naisumiteng dokumento at captured biometrics data ay ie-endorse at ita-transmit ng recipient RAP teams sa Office of Election Officer ng district, city, municipality na may hurisdiksyon sa tirahan ng aplikante para sa kailangang verification, publication, posting, at Election Registration Board (ERB) Hearing.

Ayon pa kay Laudiangco, ang operational plan ng proyekto ay inaprubahan ng en banc ng Comelec noong Oktubre 26.