Petecio, Barbosa at Yulo sasalang na sa Olympics

ni Gerard Arce - @Sports | July 24, 2021

Sisimulan nina 2019 AIBA World women’s featherweight champion Nesthy Petecio, 30th Southeast Asian Games Taekwondo men’s flyweight gold medalist Kurt Barbosa at World Gymnastics Floor Exercise titlist Carlos Yulo ang kani-kanilang mga kampanya sa qualification rounds ngayong araw, sa pagbubukas ng 2020+1 Summer Olympics Games sa Tokyo, Japan.

Unang sasalang ang 29-anyos mula Santa Cruz, Davao del Sur laban kay Marcelat Sakobi Matshu ng Congo ng 11:00 a.m. “Hindi pa niya nakakalaban yan. Pero sa tingin ko naman na kayang kaya niya yan,” wika ni 1992 Barcelona Olympics bronze medalist at coach Roel Velasco sa panayam ng Bulgar Sports sa online interview, at kung sakaling makalusot ang 30th SEAG champion sa Round-of-32 ay sunod na kakalabanin si 2018 New Delhi World champion at Jakarta-Palembang Asian Games bronze medalist Lin Yu-Ting ng Chinese Taipei. “Sa palagay ko naman malulusutan niya yan (Lin Yu Ting) basta wag lang siyang manggigil,” wika ni Velasco.

Noong TOPS Usapang Sports on Air, Huwebes ng umaga, sinabi ni Velasco na malaki ang paniniwala niyang makakabawi ang 2014 Jeju World Championships silver medalists matapos ang masaklap na pagkabigo sa 2020 Asia-Oceania Olympic Qualifying Tournament kontra kay Japanese Sena Irie. “Palagay ko mag-bounce back siya diyan kase sa qualifying medyo naging kampante siya, Lesson learn yun sa kanya. Magandang experience na nadapa siya. Ang pagbangon at resbak ang pinakamaganda. Si Nesthy nakikinig at sumusunod sa bawat turo ko naman yan kaya dapat paulit-ulit ang taktika,” paliwanag ng 52-anyos mula Bago, Negros Occidental.

Sunod na sasalang sa kompetisyon ang 22-anyos mula Abra, Bangued na si Barbosa kontra kay 2019 Manchester World Championship at 2016 World Juniors champion Jang Jun ng South Korea sa ganap na 11:52 sa round-of-16 ng men’s 58kgs category sa Makuhari Messe Hall A.

Nakatakdang simulan ng 21-anyos na biennial meet double gold medalist na si Yulo ang paghahanap sa kauna-unahang gintong medalya ng bansa kontra sa mga Turkeys at Italian gymnasts sa mixed group 5 sa Ariake Gymnastics Centre.