Para runner Reyes, bronze sa 1,500 meter T46 sa Asiad

by MC / Elyssa Nichole @Sports News | October 24, 2026

Photo: King James Reyes / Circulated

Pinatingkad ni King James Reyes ang kanyang kampanya sa Asian Para Games para sa tansong medalya sa men's 1,500-meter T46, na nagbigay sa unang athletics podium finish ng Pilipinas sa Mizuho Park Athletic Stadium sa Nagoya. 

Ang 24-anyos na tubong Loreto, Agusan del Sur, na nawalan ng braso matapos mahulog mula sa puno ng macopa sa edad na 5 ay nagtala ng personal-best na 4 minuto at 13.81 segundo para sa ika-3 puwesto.  

Si Wahumpurage Puwakpitikande ng Sri Lanka ay nagwagi ng ginto sa oras na 4:03.25, habang si Parmod ng India ang pilak sa oras na 4:09.65. “Personal best ko po,” sabi ng masayang nagtapos na estudyante ng Sports Science sa Adamson University. "Alam ko na po sa sarili ko na kayang-kaya ko pong mag-podium. Pinaghandaan po kasi namin, kasama 'yung mga sakripisyo namin."

Patungo sa huling araw, ang delegasyon ng Pilipinas, na suportado ng Philippine Sports Commission, ay nasa ika-17 sa standings na may 2 ginto, 2  pilak at 2 tanso. Ibinigay din nina Evaristo Carbonel at Edwin Enguito Jr. ang lahat ngunit kinulang sa medalya.

Nagtala si Carbonel ng personal-best na 27.18 metro sa men’s discus throw F11 para sa 5th place habang si Enguito ay 4th sa men’s high jump T63 na may clearance na 1.63 metro.