Pampanga Delta at Lady Aces nagkampeon sa NBL/ WNBL

ni Anthony E. Servinio - @Sports | December 07, 2021

Itinanghal na unang kampeon sa kasaysayan ng CTG National Basketball League (NBL) Chairman’s Cup ang Pampanga Delta matapos walisin ang La Union PAOwer, 111-98, Linggo ng gabi sa Bren Z. Guiao Convention Center. Kinoronahan din ang Paranaque Lady Aces bilang unang reyna ng Pia Cayetano Women’s National Basketball League (WNBL) sa bisa ng 83-78 pagwalis sa Taguig Lady Generals.

Sinigurado ni Florencio Serrano ang panalo sa 26 puntos at mapili na Finals MVP matapos gumawa ng 17 puntos sa 98-69 panalo ng Delta sa Game One noong Sabado.Bago ang laro, pinarangalan ng NBL si Biboy Enguio ng Muntinlupa Water Warriors bilang MVP ng taon. Sinamahan siya sa Mythical Five nina Serrano, Lerry John Mayo ng Taguig Generals, Dominick Fajardo ng DF Bulacan Republicans at Jayson Apolonio ng La Union na napili din bilang Rookie of the Year at Sportsmanship Award habang Defensive Player of the Year si Jeff Disquitado ng Laguna Pistons.

Sumandal ang Lady Aces sa dalawang free throw ni Mary Joy Galicia, three-points ni Angeli Gloriani at dalawang buslo ni Clare Castro sa huling 90 segundo upang mabura ang 76-74 lamang ng Lady Generals. Tinapos ng Paranaque ang torneo na walang talo sa 12 laro.

Pinatunayan ni Allana Lim na tama ang pagpili sa kanya bilang WNBL MVP at nagbagsak ng 30 puntos.

Samantala, nagwagi ang Uratex Dream sa JiaGuel, 21-10, upang mauwi ang pinakaunang titulo ng WNBL 3X3.