Palpak na flood control projects, ayusin na — Sec. Dizon

ni Mylene Alfonso @News | February 16, 2026

Photo: Vince Dizon - Department of Public Works and Highways

Ipinag-utos ni Department of Public Works and Highways (DPWH) Secretary Vince Dizon sa mga kontratista na agad ayusin ang mga flood control projects na natukoy na may depekto o hindi tumutugma sa itinakdang pamantayan. 

Ayon sa mga ulat, natukoy ang mga proyektong ito matapos ang isinagawang inspeksyon at beripikasyon ng DPWH. 

Sa ilalim ng mga kontrata ng DPWH, may tinatawag na “guarantee provision” kung saan obligadong itama ng kontratista—sa sarili nitong gastos—ang anumang kakulangan o diperensya na matutukoy sa proyekto. 

May ilang kontratista na umano’y nagpahayag ng kahandaang magsagawa ng kinakailangang pagkukumpuni alinsunod sa kanilang kasunduan. 

Samantala, sinusuri rin ng DPWH ang mga discrepancy kaugnay ng ilang proyekto sa Bulacan na napaulat bilang “ghost projects” bunsod ng maling grid coordinates na nakatala sa opisyal na records. 

Ang grid coordinates ang ginagamit upang matukoy ang eksaktong lokasyon ng proyekto sa mapa at monitoring system. 

Batay sa joint inspection na isinagawa sa lugar, may mga proyektong napatunayang umiiral at gumagana, ngunit nagkaroon ng kalituhan dahil sa hindi tugmang datos ng lokasyon. 

Patuloy ang beripikasyon ng mga dokumento at rekord upang maitama ang anumang maling impormasyon at malinawan ang katayuan ng mga nasabing proyekto.