Pahirapan ang kita ng mga taxi drivers, help naman riyan!

ni Ka Ambo - @Bistado | February 5, 2021

Papakyaw na rin ng COVID-19 vaccine ang Red Cross.

Sasali na rin sila sa engrandeng negosyo!

◘◘◘

Dumarami na ang kaso ng nakawan.

As expected!

◘◘◘

Maraming reserbang dolyar ang Bangko Sentral.

Sintomas ‘yan ng krisis—dahil walang nais gumastos para magnegosyo!

◘◘◘

Nakaimbak lang ang dolyares sa vault dahil hindi ito ini-invest na siyang sukatan ng mas malusog na ekonomiya.

Maaaring wala ring naglalagak at nangungutang sa bangko.

‘Yan ay dahil wala nang kliyente at konsiyumer!

◘◘◘

Kung magbubukas ka ng negosyo ngayon gayung alam mong kakaunti ang customer o konsiyumer, handa ka bang magpakalugi sa loob ng 6 hanggang 12 buwan?

Sino’ng baliw, itaas ang kaliwang kamay!

◘◘◘

Nahihirapan ang mga taxi driver na bayaran ang boundry.

Nagkakasya sila sa average P500 entrega kay misis na dalawang araw na ibabadyet kasama ang bayad-utang sa Bumbay!

◘◘◘

Maraming taxi units ang nasa garahe lang.

Kakaunti na ang driver na nagboboluntaryong magpaloko sa operators!

◘◘◘

Lugi rin ang operators dahil kakaunti ang pumapasadang units.

Ganyan din ang sitwasyon sa tricycle, jeep, bus, barko at eroplano.

Hindi ‘yan biro—isa itong krisis na walang kapantay!

◘◘◘

Sarado rin ang mga clubs, beerhouses, restaurant, motel, hotel at karenderya.

Isang eksena ito ng serye ng mga ghost town sa paligid!

◘◘◘

Ang mga negosyong nakabukas at empleadong nagtatrabaho—ay naghaharimunan lang sa panggastos para may makain.

Marami ay inaaway na ng mga pinagkakautangan!

◘◘◘

Gusto ng mga airlines na bigyan din ng milyun-milyong ayuda mula sa gobyerno.

Kumbaga ang pera ng bayan ay isasaklolo sa mga kroni at buwitre!

◘◘◘

Bawal ang face-to-face campaign sa 2022 election.

Nag-abiso na si meyor!

‘Yung pambili ng boto, igi-GCash na lang daw!