ni Fely Ng @Bulgarific | August 10, 2022
Hello, Bulgarians! Matapos ang pananalasa ng Bagyong Egay at Falcon sa iba’t ibang bahagi ng Central at Northern Luzon, tumulong ang Philippine Amusement and Gaming Corporation (PAGCOR) sa mahigit 31,000 pamilya sa mga lugar na tinamaan ng bagyo sa Bulacan at Pampanga, mula Agosto 5 hanggang 7, 2023, ang PAGCOR ay naghatid ng mga food at non-food packs na kinabibilangan ng bigas, canned goods, bottled water, at hygiene essentials sa siyam na local government units (LGUs) sa nasabing mga lalawigan, na isinailalim sa state of calamity.
Sa lalawigan ng Bulacan, ang state-run gaming and regulatory firm ay nag-turn over ng kabuuang 12,000 food at non-food packs sa mga pamilya sa binaha na munisipalidad ng San Rafael, Calumpit, at Obando, Malolos City at 5th district ng Bulacan.
Ayon kay Reyce De Vera, Assistant District Officer ng 3rd District ng Bulacan, 7,700 pamilya mula sa 3rd district ang nalugmok sa epekto ng matinding pagbaha sa kanilang mga lugar.
Kabilang sa mga bayang nalubog sa baha, na nakatanggap ng tulong mula sa PAGCOR ay ang San Rafael, San Ildefonso, San Miguel, at Doña Remedios Trinidad. “Isang taos pusong pasasalamat po sa PAGCOR. Malaking tulong po ito sa ating mga kababayan sa ikatlong distrito ng Bulacan,” pahayag niya.
Samantala, ang PAGCOR ay nag-donate ng kabuuang 17,500 food at non-food packs sa mga apektadong komunidad sa Pampanga. Sa bilang na ito, 5,000 food packs at 1,500 non-food packs ang naibigay sa Pamahalaang Panlalawigan; 6,000 food packs sa 2nd District; 3,000 food at non-food packs sa lokal na pamahalaan ng Candaba; at 2,000 para ipamahagi sa iba pang apektadong lugar sa Central Luzon.
Ang Municipal Disaster Risk Reduction and Management Officer II ng Candaba na si Galen Gumabon ay nagpahayag ng pasasalamat sa PAGCOR sa pagbibigay ng tulong sa mga pamilyang nawalan ng tirahan dahil sa mga bagyo. “Itong tulong na ibinahagi ni PAGCOR ay malaking bagay na sa mga pamilya na naapektuhan ng Bagyong Egay, lalo na ‘yung may mga kasama sa bahay ng nawalan ng kabuhayang may kinalaman sa agrikultura – gaya ng palayan, fishpond, at gulayan. Nae-encourage po sila na ‘wag mawalan ng pag-asa dahil may mga taong handang tumulong tulad po ninyo sa PAGCOR,” paliwanag niya.
Ayon sa pinakahuling ulat mula sa National Disaster Risk Reduction and Management Council (NDRRMC), mahigit 800,000 pamilya o 3 milyong indibidwal mula sa Central at Northern Luzon ang naapektuhan ng pananalasa ng Bagyong Egay at Falcon, habang ang pinsala sa sektor ng agrikultura ay may umabot sa P2.9 bilyon.
Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.