ni Grace Poe - @Poesible | February 23, 2021
Gawa ng panahon, marami ang nakakakuha ng karamdaman na dati-rati ay pinagwawalang-bahala lamang natin. Ngayon, kapag nagka-sipon, ubo, sore throat, o sinat, grabe na ang pag-aalala. Nand’yan na ang agam-agam na baka nakakuha na ng COVID-19 at naiuwi ito sa pamilya o naikalat sa trabaho. Ngayon, ‘pag may bumahing o umubo, ang bilis lumayo ng mga tao. Kaya palagi nating pinaaalalahanan ang ating mga kababayan na palakasin ang immune system para may panlaban sa sakit.
Napakahirap ng sitwasyon ng ating bansa sa kasalukuyan. Gusto nating maging ligtas ang mamamayan kaya nagtakda ng quarantine ang pamahalaan. Gayunman, naghihingalo ang ating ekonomiya, kaya kailangang magluwag kahit pa mayroon pa ring virus. Sa pagitan ng kaligtasan ng tao at ng ekonomiya, tila naiipit ang nagpapatakbo ng ating bansa dahil kapwa mahalaga.
Naniniwala tayong ang pagbubukas ng ekonomiya ay kinakailangang sabayan ng malakas na programa ng pagbabakuna sa ating bansa. Habang hinihintay natin ang pagdating ng mga bakuna, dapat naghahanda na ang mga ahensiya ng pamahalaan na magpapatupad nito. Kabilang ang paghahanda ng mga ospital at piling vaccination sites, pagsasanay sa mga taong tatao rito, at ang pagsusuri sa master list ng mga sektor at ng mga taong dapat bigyang-prayoridad na makatanggap ng unang turok.
Sakaling aprubahan ng Pangulo ang rekomendasyon ng Interagency Task Force on Emerging Infectious Diseases na ilagay na ang Metro Manila sa Modified General Community Quarantine, tingnan na rin dapat ang pagluluwag sa transportasyon. Kasabay ng pagbubukas ng ekonomiya, naniniwala tayong dapat na ring dagdagan ang mga pampasaherong sasakyan sa ating kalsada at dagdagan ang kapasidad ng mga pasahero, habang malay pa rin sa ipinatutupad na health protocols. Para ito makabawi naman sa kita ang mga tsuper na nagpipilit maghanapbuhay. Pataas ang presyo ng krudo at gasolina, tapos limitado pa ang bilang ng pasahero. Hirap din ang mga pumapasok sa trabaho dahil kaunti lang ang puwede nilang sakyan.
Ang pagliligtas ng buhay at ang paglimita sa pinsala sa ating ekonomiya ay nangangailangan ng maingat na pagbalanse, bagay na patuloy nating babantayan at isusulong habang kinahaharap natin ang pandemyang ito.