Pag-unlad ng Aquatics umaarangkada sa PAI

by MC @Sports News | May 29, 2026

Photo: Tiknalakay ni Philippine Aquatics, Inc. (PAI) Secretary General Eric Buhain, sa lingguhang Tabloids Organization in Philippine Sports (TOPS) Usapang Sports ang patuloy na pagpapalawak ng mga grassroots program para mga swimmers ng bansa upang higit pang makatuklas ng mga world-class na manlalangoy kahapon sa Rizal Memorial Sports Center. (Reymundo Nillama)  

Patuloy ang Philippine Aquatics, Inc. (PAI) sa pagpapalawak ng grassroots at elite development program sa layuning makalikha ng world-class na manlalangoy  sa iba’t ibang larangan ng aquatics. 

Ayon kay PAI Secretary General Eric Buhain, nagbubunga na ang holistic development program dahil sa  pagpapatupad ng regional program kabilang ang coaching at training activities, learn-to-swim programs, at serye ng mga kompetisyon upang mahasa ang mga bagong talento. “We are focusing on the continuity of our program from the regional level up to the national level. We congratulate our regional directors who were reelected because they will continue guiding our swimmers not only to win competitions but also to improve their performance times,” pahayag ni Buhain sa Tabloids Organization in Philippine Sports, Inc. (TOPS) “Usapang Sports” kaagapay ang PSC, Behrouz at Pocari Sweat kahapon sa PSC Conference Room. 

Ipinunto ni Buhain na ang malaking bilang ng mga kalahok sa National Tryouts noong Abril para sa pagpili ng pambansang koponan na lalahok sa 40th Southeast Asian Age Group Championships at 20th Asian Age Group Championships ay patunay sa paglakas ng antas ng kompetisyon. 

 Mahigit sa 1,000 atleta ang sumali sa tryouts. “The level of competition in the national tryouts was truly intense because these swimmers are the best from their regions,” aniya na nakakuha ng bagong mandato kasama si PAI president Miko Vargas sa election sa PAI noong Marso. Gamit ang bronze medal time mula sa nakaraang age-group championships bilang qualifying standard, nakabuo ang PAI ng 24-man team para sa Southeast Asian Age Group Championships sa Malaysia, habang 20 batang swimmers ang bubuo sa koponan para sa Asian Age Group Championships sa Bangkok, Thailand. 

Sinabi rin ni Buhain na plano rin ng bansa na magpadala ng mga koponan sa water polo, diving, artistic swimming, at open water swimming. Nakatakda ring idaos ng Pilipinas ang 4th Southeast Asian Open Water Swimming Championships sa Agosto 21 hanggang 23 sa Boracay New Coast sa Aklan.