Pag-stop ng filing ng charges… Apela ni Vhong Navarro, ibinasura ng CA

ni Lolet Abania | September 25, 2022

Ibinasura ng Court of Appeals (CA) ang apela ng aktor na si Vhong Navarro na irekonsidera ang kanilang naging desisyon na pagbaligtad sa pag-dismiss ng Department of Justice (DOJ) sa inihaing complaints na rape at acts of lasciviousness cases laban sa kanya ng model-stylist na si Deniece Cornejo.

Sa isang 7-pahinang resolusyon na promulgated noong Setyembre 20 at nilagdaan ni Associate Justice Florencio Mamauag Jr., ni-reject ng CA Special 14th Division ang inihain ni Navarro na motion for reconsideration at motion for the issuance of a status quo ante order dahil anila ito sa “lack of merit.”

Ang apela o plea ay may kaugnayan sa July 21 decision ng appellate court, kung saan iniutos sa City Prosecutor ng Taguig City na mag-file ng mga kaso matapos na ang CA ay i-reverse at i-set aside ang mga resolusyon na inisyu ng DOJ noong Abril 30, 2018, at Hulyo 14, 2020.

“[T]he issues raised by Navarro in his motion, i.e., the parties’ credibility, the truthfulness of their respective claims and the strength of their evidence, are matters best left to the determination of the trial court after a full-blown trial on the merits,” batay sa resolution.

“We reiterate once more that preliminary investigation is merely inquisitorial. It is not a trial of the case on the merits and has no purpose except that of determining whether a crime has been committed and whether there is probable cause to believe that the accused is guilty thereof. While the fiscal makes that determination, he cannot be said to be acting as a quasi-court, for it is the courts, ultimately, that pass judgment on the accused, not the fiscal,” saad pa rito.

Sa pag-deny sa hiling ni Navarro para sa issuance ng status quo ante order, iginiit pa ng CA na ang kanyang kaso ay hindi nasasakop sa ilalim ng anuman sa kinikilalang exceptions para sa pag-grant ng petisyon.

Sa ngayon, nasa kostudiya si Navarro ng National Bureau of Investigation (NBI) matapos na ang Taguig Regional Trial Court ay maglabas ng isang warrant of arrest dito para sa isang non-bailable charge na rape.

Noong Setyembre 19, sumurender si Navarro sa NBI at nag-post ng bail matapos na ang korte ay mag-isyu ng isang warrant of arrest laban sa kanya sa umano’y acts of lasciviousness.

Inakusahan ng mga prosecutors si Navarro ng panggagahasa o rape kay Cornejo sa pamamagitan ng anila, “force, threat, and intimidation [and by purposely intoxicating her on January 2014]”.

Una nang iginiit ng abogado niyang si Atty. Alma Mallonga na si Navarro ay biktima at ang mga isinampang kaso laban sa kanya ay hindi totoo.

Matatandaan na noong Enero 22, 2014, si Navarro na malubhang nasugatan matapos na bugbugin ng isang grupo kung saan kabilang umano rito sina Cornejo at ang negosyanteng si Cedric Lee.