'Pag gumawa ng krimen — Sen. Robin... 10-anyos, puwede nang managot sa batas

ni Mylene Alfonso @News | July 19, 2025

File Photo: Robin Padilla - FB

Inihain ni Senador Robin Padilla ang panukalang batas na layuning ibaba ang minimum age mula 15 hanggang 10 taong gulang ang criminal responsibility para sa mga menor-de-edad na inakusahan ng mga mabibigat na krimen tulad ng murder at rape. 

Sa ilalim ng panukala ni Padilla, ang mga batang may edad na 10 hanggang 17 na gumawa ng krimen ay mapaparusahan ng higit sa 12 taong pagkakakulong at hindi na magiging exempted sa criminal prosecution.

Layunin ng panukalang batas na amyendahan ang Republic Act No. 9344 o ang Juvenile Justice and Welfare Act, na naglilibre sa asunto sa batang wala pang 15 taong gulang na panagutan ang krimen at isasailalim na lamang sa rehabilitasyon sa pamamagitan ng mga intervention programs. 

“The law remains unresponsive, if not completely remiss in exacting justice, from juvenile offenses relative to heinous crime,” wika ni Padilla sa kanyang explanatory note kasabay na rin mga dumaraming bilang ng mga kabataang nagkasala sa bansa. 

Kabilang sa mga karumal-dumal na krimen ay parricide, murder, infanticide, serious illegal detention kung saan pinatay o ginahasa ang biktima, robbery with homicide o rape, at drug-related offenses sa ilalim ng Comprehensive Dangerous Drugs Act at iba pa.

Nabatid na ang mga menor-de-edad na wala pang 15 taong gulang na nakagawa ng mga hindi karumal-dumal na krimen ay ilalagay pa rin sa ilalim ng pangangalaga ng mga magulang o tagapag-alaga at isasailalim sa mga interbensyon na nakabatay sa komunidad na pinamumunuan ng mga social welfare officers.

Para sa mga umulit na nagkasala na may edad 15 hanggang 18, inirerekomenda ang intensive rehabilitation programs.

Maaari naman magpatuloy ang mga korte na mag-isyu ng suspended sentences para sa mga non-heinous offenses kahit na ang menor-de-edad ay tumuntong ng 18 taong gulang sa panahon ng paglilitis.

Giit ni Padilla na hindi layunin ng panukalang batas na parusahan ang mga bata kundi para matugunan ang tinatawag niyang gap sa kasalukuyang batas pagdating sa mabibigat na krimen na ginagawa ng mga menor-de-edad.

Dagdag pa ng senador na maraming mga bata ngayon ang mas mabilis na nag-mature at may kakayahang maunawaan ang mga kahihinatnan ng kanilang mga aksyon dahil sa maagang pagkakalantad sa teknolohiya at internet.