Paalala sa gov’t workers… Tatanggap ng regalo, bawal – CSC

ni Lolet Abania | November 19, 2022

Ipinaalala ng Civil Service Commission (CSC) sa lahat ng opisyal ng gobyerno at mga empleyado ang tungkol sa “no gift policy,” lalo na ngayong nalalapit ang Kapaskuhan.

Ayon kay CSC Commissioner Aileen Lizada, ipinagbabawal ng tatlong batas ang pagtanggap at/o paghingi ng sinumang government workers ng anumang mga regalo, serbisyo, at pabor sa publiko.

Sa ilalim ng Presidential Decree no. 46 ay nakasaad, “it is believed necessary to put more teeth to existing laws and regulations to wipe out all conceivable forms of graft and corruption in the public service, the members of which should not only be honest but above suspicion and reproach.”

Ang Republic Acts 6713 at 3019 ay ipinagbabawal ang, “directly or indirectly requesting or receiving any gift, present, share, percentage, or benefit, for himself or for any other person, in connection with any contract or transaction between the Government and any other part, wherein the public officer in his official capacity has to intervene under the law.”

Pinayuhan naman ni Lizada ang mga agency’s head na maging mabuting mga ehemplo sa kanilang mga empleyado sa pagsunod sa mga batas.

Bukod sa pagtanggap ng mga regalo, ipinagbabawal din ang anumang uri ng solicitation.

“Sa mga heads of agencies be good examples ‘wag po kayong magso-solicit kayo, ‘yung division chief niyo magso-solicit lahat ay magso-solicit. Sabihan niyo ho sa baba na kung may magpadala ng regalo ay no gift policy kayo so ‘wag na ho hirap mga tao, hirap magnegosyo at hirap mga operators ‘wag na po dagdagan ang cause of doing business nila,” giit ni Lizada.

“Gusto n’yo bang mapreso sa Pasko? When in government service ‘yung ating pagseserbisyo walang kapalit we are servicing the public,” sabi pa ni Lizada.

Samantala, ipinaalala din ng Bureau of Internal Revenue (BIR) sa kanilang mga opisina na “politely” o magalang na tanggihan ang lahat ng uri ng mga regalo mula sa mga taxpayers.

Ayon kay BIR Revenue Region 6 Director Jethro Sabariaga, nagbigay na ng direktiba sa kanila ang bagong appointed na si Commissioner Romeo Lumagui Jr. na ang no gift policy ay dapat na mahigpit na ipatupad sa buong taon.

“Nagpaalala siya na sa nalalapit na Kapaskuhan na bawal tumanggap ng regalo o bawal mamasko sa ating mga taxpayer. Kasi nagkakaroon ng misimpression na nagiging kapalit ‘yan ng serbisyong idinudulot natin,” saad ni Sabariaga.