P865M ransom kapalit ng buhay ng 17 misyonaryo sa Haiti, hinihingi ng 400 Mawozo gang

ni Jasmin Joy Evangelista | October 23, 2021

Humihingi ng $17 milyon o katumbas ng halos P865 milyong ransom ang mga armadong grupo at lider ng 400 Mawozo gang na dumukot sa 17 Christian missionaries sa Haiti.

Sa inilabas na video ng grupo, binantaan ng mga ito ang mga awtoridad na papatayin nila ang bihag nilang 17 misyonaryo kapag hindi ibinigay ang hinihingi nilang ransom kapalit ang kalayaan ng mga biktima.

Maging ang Prime Minister ng Haiti na si Ariel Henry at hepe ng National Police na si Leon Charles ay winarningan nilang may mapapahamak din sa oras na hindi maaksiyunan ang kanilang kondisyon.

Ang Ohio-based Christian Aid Ministries ay dinukot ng grupo pagkagaling ng mga ito sa bahay ampunan sa Port-Au-Prince.