P5K cash allowance sa mga guro, ibibigay sa Agosto 22 – DepEd

ni Lolet Abania | August 19, 2022

Magpapamahagi ang Department of Education (DepEd) ng cash allowance na P5,000 sa lahat ng mga guro sa pagbubukas ng mga klase sa Lunes, Agosto 22.

“We would like to announce na sa pasukan, August 22, we will be giving our teachers ‘yung tinatawag nating cash allowance na P5,000,” pahayag ni DepEd spokesperson Michael Poa sa isang joint press conference.

Ayon kay Poa, makadaragdag at makapagbibigay ito sa mga guro ng assistance para sa kanilang pagbabalik sa paaralan.

“Lahat po ng teachers makakatanggap. Ibababa po ‘yan, I think doon sa school’s divisions — I’ll confirm — pero lahat po ay makakatanggap by August 22,” sabi ni Poa.

Samantala, ayon sa Office of the Vice President (OVP) palalawigin nila ang distribusyon ng PagbaBago bags na naglalaman ng mga school supplies at hygiene kits sa mas maraming lugar.

“‘Yan din ang plano natin. Hangga’t meron tayong resources para itulong at i-distribute, lalo na doon sa mga areas na kailangan na kailangan talaga ng school supplies at hygiene kits, i-expand natin ang operation,” saad ni OVP spokesperson Reynold Munsayac.

Nang tanungin kung target ng OVP ang expansion nito sa nationwide level, aniya, “[OVP will] look into it.”

“Titingnan ho natin. Siguro ho dahil limited lang naman ‘yung resources, targeted areas lang ito. ‘Yung mas nangangailangan, mas uunahin natin,” wika ni Munsayac.

Sinabi pa ng opisyal na isinagawa ng OVP ang PagbaBago campaign sa Limasawa Island noong nakaraang linggo.