Pinoy kasambahay, may taas-sahod sa HK – DMW

ni Lolet Abania | October 6, 2022

Magiging malaking pakinabang para sa mga overseas Filipino workers (OFWs), ang salary increase para sa mga foreign domestic workers sa Hong Kong, na katumbas ng P750 sa Philippine peso, ayon sa Department of Migrant Workers (DMW).

Sa isang statement na inilabas nitong Miyerkules, sinabi ng DMW na ang mga Filipino domestic workers sa Hong Kong ay magkakaroon na ng kita sa ngayon na HK$4,730 o P35,475, matapos na ianunsiyo ng Hong Kong government noong Setyembre 30 na itataas nila ang minimum allowable wage at food allowance para sa mga foreign domestic workers.

“The increase in pay comes after a two-year wage freeze in HK due to the COVID-19 pandemic. At this time of rising prices due to a stronger US dollar, this new minimum wage hike is a boon to our kasambahays in HK,” pahayag ni DMW Secretary Susan Ople.

Ayon sa DMW, ang wage hike, kung saan naging epektibo noong Oktubre 1, anang ahensiya ay, “HK$100 more than the previous HK$4,630 or P34,725 set in September 2019.”

Habang ang bagong minimum food allowance naman na HK$1,196 o P8,970 ay may HK$23 higit pa sa dating HK$1,173 o P8,797.

Sinabi ng DMW na ang naturang food allowance ay ibinibigay lamang sa mga domestic workers na naninirahan sa labas at hindi sa tirahan ng kanilang employer.

Umani naman ng positibong reaksyon ang bagong development na ito mula sa Filipino community na nagtatrabaho sa Hong Kong.

Batay sa datos mula sa Hong Kong Immigration Department, ayon sa DMW, nakapagtala ng 188,171 OFWs sa Hong Kong hanggang sa pagtatapos ng Agosto 2022.

“This accounted for more than half of the city’s estimated 333,000 migrant domestic worker labor force,” sabi pa ng DMW.