P211M kita ‘di idineklara, online store, ipinasara ng BIR

ni Mai Ancheta @News | March 16, 2026

Photo: Bureau of Internal Revenue

Ipinasara ng Bureau of Internal Revenue (BIR) ang isang malaking online selling operation sa Jamestown at Mabini St., Cebu City dahil sa kabiguang ideklara ang tunay na kita na umaabot sa mahigit P211 milyon.

Ayon sa BIR, nakatanggap ang mga otoridad ng report na isang online seller ang nagbebenta umano ng luxury goods sa pamamagitan ng live selling sa social media platforms at hindi umano nag-iisyu ng opisyal na resibo at hindi nakarehistro sa BIR.

Matapos ang ginawang surveillance at beripikasyon, ipinatupad ng BIR ang Oplan Kandado.

Batay sa nakuhang business records sa inilunsad na operasyon, umabot sa 211 million pesos ang gross sales ng online store at may tax liability o hindi binayarang buwis sa gobyerno na P40.4 milyon.

Hindi nadatnan ng mga otoridad ang mga taong nagpapatakbo sa online store na nauna nang pinadalhan ng abiso ng ahensya pero hindi umano pinansin ng mga ito.