P2 dagdag-pasahe, suspendido pa rin — DOTr

ni Jeff Tumbado @News | August 7, 2026

Photo: LTFRB / File

Mananatiling suspendido ang panukalang P1 hanggang P2 na dagdag-pasahe sa mga pampublikong sasakyan matapos igiit ng Department of Transportation (DOTr) na patuloy pa itong pinag-aaralan upang matiyak ang balanse sa kapakanan ng mga tsuper at ng mga pasahero.

Ayon kay DOTr Acting Secretary Giovanni Lopez, hindi pa tinatanggihan ang panukalang taas-pasahe, bagkus ay pansamantala lamang itong isinantabi habang nagpapatuloy ang pagdinig at pagsusuri ng Land Transportation Franchising and Regulatory Board (LTFRB).

Sinabi rin ni Lopez na pinag-aaralan ng pamahalaan ang iba pang paraan upang matulungan ang mga tsuper at operator ng pampublikong sasakyan, kabilang ang pagpapatuloy ng mga fuel subsidy at iba pang posibleng ayuda.