Dahil sa El Niño... Presyo ng bigas, tataas

by Jeff Tumbado @News | September 26, 2026

Photo: File / DA

Posibleng tumaas ang presyo ng palay at bigas sa bansa dahil sa inaasahang matinding epekto ng strong El Niño, ayon sa National Food Authority (NFA).

Sinabi ni NFA Administrator Larry Lacson na batay sa pagtataya ng Department of Agriculture (DA), maaaring bumaba ng hanggang 30 porsyento ang produksyon ng palay ngayong wet season dahil sa tagtuyot na posibleng magpatuloy hanggang sa unang bahagi ng 2027.

Ayon kay Lacson, kapag bumaba ang lokal na produksyon, posibleng magkaroon ng matinding kompetisyon sa limitadong suplay ng palay sa pagitan ng mga rice miller at iba pang mamimili. Maaari itong magresulta sa pagtaas ng presyo ng palay at, kalaunan, ng bigas sa merkado.

Dagdag pa niya, may limitasyon din ang kakayahan ng NFA na makipagkumpitensya sa mga pribadong negosyante dahil nasa P30 kada kilo ang maximum buying price na pinapayagan sa ahensiya para sa clean and dry na palay.

Samantala, sinabi ng DA na nakahanda itong magbigay ng fuel subsidy, binhi, fertilizer at iba pang suporta sa mga magsasaka upang mabawasan ang epekto ng tagtuyot sa produksyon.

Patuloy din ang pag-aangkat ng bigas ng pamahalaan upang magkaroon ng karagdagang buffer stock at makatulong na mapanatili ang sapat na suplay sa bansa sakaling bumaba ang lokal na produksyon.

Ayuda muna — DOTr... Taas-pasahe, tablado

ni Mylene Alfonso @News | September 23, 2026

Photo: LTFRB / File

Nilinaw ng Malacañang na wala pang pinal na desisyon kaugnay sa pagtataas ng pamasahe sa kabila ng patuloy na pagmahal ng presyo ng langis dulot ng krisis sa Middle East.

Ayon kay Palace Press Officer Undersecretary Claire Castro, layunin ni Pangulong Ferdinand Marcos Jr. na mapanatiling balanse ang sitwasyon upang hindi agad maramdaman ng mga commuter ang epekto ng oil price hike.

Aniya, patuloy na tinutugunan ng pamahalaan ang pangangailangan ng transport sector habang iniiwasang maipasa sa publiko ang dagdag na pasanin.

“Mabigat po talaga kasi kung pagsasabay-sabayin lahat, so noon pa naman ang gusto ng Pangulo ay balansiyado, tumaas man ang presyo ng krudo ay hindi naman masyadong mararamdaman ng ating mga commuters dahil—kung tataas man ang pamasahe,” pahayag ni Castro sa briefing sa Palasyo.

“So, ang ginagawa po ng gobyerno ng pamahalaan ay tinutugunan naman din po ang pangangailangan mismo dito sa transport sector,” ani Castro.

Sinabi rin aniya ni Department of Transportation (DOTr) Secretary Giovanni Lopez na ginagawa ng gobyerno ang lahat ng posibleng hakbang upang matulungan ang mga tsuper at transport operator, at ang pagtataas ng pamasahe ay dapat manatiling huling opsyon.

“Pinipiga pa muna natin ang gobyerno kung ano pang puwedeng gawin para makatulong sa mga tsuper at transport operator na hindi ipasa sa mga commuters ang pasanin. Kung pagtaas ng pamasahe ay sana maging last resort natin. Tuluy-tuloy pa rin ang DOTr initiatives para maibsan ang pagtaas ng presyo ng langis, tulad ng fuel discount, free toll sa mga buses,” wika ni Lopez.

“At napag-usapan na rin sa UPLIFT meeting last week with ES Ralph Recto ang targeted subsidy para sa mga transport group sa pamamagitan ng AICS,” paliwanag ni Lopez.

Kabilang sa mga patuloy na ipinatutupad na ayuda ng DOTr ang fuel discount, libreng toll para sa mga provincial bus, PITX terminal fee waiver para sa PUVs hanggang katapusan ng taon, waived terminal fees sa 86 SM transport terminals, 50% diskwento sa MRT-3 at LRT-2, P1 Ro-Ro terminal fee, at mga libreng sakay na programa. 

Inihahanda rin ang targeted subsidy para sa mga transport group sa pamamagitan ng Assistance to Individuals in Crisis Situation (AICS).

Binigyang-diin naman ni Castro na bagama’t hindi kontrolado ng gobyerno ang digmaan sa Middle East at ang epekto nito sa presyo ng langis at pagkain, patuloy nitong pinaghahandaan ang mga hakbang upang mabawasan ang epekto nito sa mga Pilipino.

Dagdag-suweldo, pending pa... Taas-pasahe, inihirit

by BRT @News | September 14, 2026

Photo: File

Kasabay ng inaasahang malakihang dagdag-presyo sa mga produktong petrolyo, nanawagan naman ang transport groups na ipasa na ang hirit na taas-pasahe.

Hirit ng mga tsuper kay Pangulong Bongbong Marcos, kasabay ng kaarawan niya kahapon, aksyunan na ang nakabinbing petisyon sa taas-pasahe.

Samantala, may mga komyuter naman na nananawagang ipatupad na ang naka-pending na dagdag-sahod para makatugon sa pagtaas ng pamasahe, petrolyo at iba pang bilihin.