P7 dagdag-singil sa kuryente, napigil ng DOE

ni Gina Pleñago @News | May 6, 2026

Photo: Energy Secretary Sharon Garin - Department of Energy Philippines

Napigil ng Department of Energy (DoE) ang pagtaas ng P7 sa presyo ng kuryente. 

Ayon kay Energy Secretary Sharon Garin, bunsod ito ng kanilang mga inisyatibo bilang kanilang pangunahing mandato.

Aniya, mapabababa pa ang singil kung aalisin ang value-added tax (VAT) nito.

Subalit diin ng Kalihim, kailangang pag-aralang maige ang panukalang VAT removal para matukoy kung ikabubuti ito ng buong bansa. 

Bagama’t suportado, sinabi ni Garin na hindi ang DoE ang magdedesisyon nito kundi ang Economic managers at Kongreso dahil may mas malawak itong epekto sa ekonomiya.

Kailangan kasi aniyang masiguro na balanse ang mababang electricity costs sa ibinibigay na serbisyo-publiko ng gobyerno.

Nitong Lunes, naghain si Senadora Risa Hontiveros ng Senate Bill 2076 na layong alisin ang VAT sa electricity systems loss na kasalukuyan nating pinapasan.

Taas-pasahe sa jeep at bus, aprub na

ni Mai Ancheta @News | March 16, 2026

Photo: LTFRB

Aasahan na ang dagdag-singil sa pamasahe sa jeep at bus, simula bukas.

Ito ang inihayag ni Land Transportation Franchising and Regulatory Board (LTFRB) bilang tugon sa hirit na fare hike ng iba't ibang transport groups dahil na rin sa epekto ng mataas na presyo ng langis.

Ayon kay LTFRB Chairman Assistant Secretary Vigor Mendoza, tapos na ang masusing pag-aaral at isinasapinal na lamang nila kung magkano ang dapat na idagdag sa kasalukuyang pamasahe sa jeep at bus.

Pero sinabi ni Mendoza na hindi kasama sa iaanunsiyo sa Martes ang mga taxi at UV Express dahil kailangan lang isalang sa mga pagdinig at nationwide consultation kung magkano ang dapat na itaas sa pamasahe.

Samantala, nagtaas na ng singil sa pamasahe ang ilang provincial bus na bumibiyahe patungo sa Metro Manila kahit wala pang inilalabas na direktiba ang LTFRB.

Ang German Espiritu Liner ay nagtaas na ng singil, mula sa dating P85 na biyaheng Bulakan, Bulacan hanggang Divisoria ay naging P99 na gayundin ang iba pang pampasaherong bus patungong norte.

Taas-pasahe, kasado na

ni Mai Ancheta @News | March 12, 2026

Photo: File: LTFRB

Wala pang desisyon sa hirit ng public transport groups na magtaas ng pasahe sa gitna ng patuloy na pagtaas ng presyo ng produktong petrolyo dahil sa nagaganap na tensiyon sa Middle East.

Ayon kay Transportation Secretary Giovanni Lopez, kailangang pag-aralang mabuti ang hirit na dagdag-pasahe sa jeep.

Kailangan aniyang maisaalang-alang ang epekto ng pagtaas ng mga bilihin at mabalanse ito sa kasalukuyang sitwasyon kaya inatasan nito si Land Transportation Franchising and Regulatory Board Chairman Vigor Mendoza na pag-aralan ulit ang umiiral na provisional fare.

"Sinabi ko kay Chairman Vigor aralin mo ulit, you have to re-crunch the number, especially on what is going on right now," ani Lopez.

Sa hiwalay na panayam sa kalihim, sinabi nitong mayroong nakabinbin na petisyon para sa dagdag-pasahe at nagsumite na rin ng rekomendasyon ang LTFRB pero ibinalik nito para pag-aralan mabuti para sa pinal na numero kung magkano ang idadagdag sa pasahe.

Matatapos aniya sa loob ng linggong ito ang desisyon ng LTFRB.