P1M multa sa mag-i-issue ng gift certificate na may expiration date

ni Atty. Persida Rueda-Acosta @Magtanong Kay Attorney | December 29, 2022

Dear Chief Acosta,

Ako ay nakatanggap ng gift check last January ngayong taon na iniregalo noong birthday ko, pero nakalimutan ko itong gamitin agad. Kahapon ay sinubukan kong gamitin ang gift check sa tindahan na nag-issue nito, ngunit sinabihan ako na napaso na diumano ito noong Hulyo sapagkat meron lamang itong bisa na anim na buwan na mula nang in-issue. Nang aking inspeksyunin ang gift check, doon ko lamang napansin na nakalagay nga sa likod na ito ay na-expire na noong ika-5 ng Hulyo 2022. Ganun ba talaga ‘yun? - France

Dear France,

Ang batas na sumasaklaw tungkol sa iyong katanungan ay ang Republic Act No. 10962 o mas kilala bilang “Gift Check Act of 2017”. Nakasaad sa Sections 5 at 11 ng batas na:

“SEC. 5. Prohibitions. - The following acts shall be unlawful:

(a) Issuing a gift check that bears an expiry date;

(b) Imposing an expiry date on the stored value, credit, or balance of the gift check; or

(c) Refusing to honor the unused value, credit, or balance stored in the instrument.

xxx xxx xxx

SEC. 11. Penalties.- Any person, natural or juridical, who violates the provisions of this Act shall be obligated to return the unused balance of the gift check within ninety (90) days from the declaration of the violation by the DTI and shall be subject to a fine to be imposed by the Secretary of Trade and Industry, which shall in no case be less than five hundred thousand pesos (P500,000) nor more than one million pesos (P1,000,000): Provided, that for the second offense, in addition to the fine, the issuance of gift check by the offending issuer shall be suspended for three (3) months: Provided, further, that for the third offense, in addition to the fine, the issuance of gift check by the offending issuer shall be canceled.”

Alinsunod sa mga nabanggit na probisyon ng batas, ang pagtatalaga ng expiration date sa gift check, maging sa anumang naiwang balanse nito ay mariing ipinagbabawal. Ang nasabing paglabag ay maaaring ilapit sa Department of Trade and Industry na siyang magpapataw ng karampatang parusa sa mga lalabag na establisimyento. Ang establisimyento na lalabag sa batas ay inatasang ibalik ang halagang nakasaad sa gift check o ang balanse ng gift check na hindi pa lubusang nakonsumo. Bukod dito, sila rin ay mapapatawan ng multa na hindi bababa sa P500,000 at hindi hihigit sa P1,000,000. Nakasaad din sa batas na ang paulit-ulit na paglabag sa batas ay maaaring magresulta sa pagsuspinde o pagkansela sa karapatan ng establisimyento na mag-issue ng gift checks.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.