P1K pension ng indigent senior citizens, matatanggap sa Enero 2023 – NCSC

ni Lolet Abania | August 4, 2022

Ipinahayag ng National Commission of Senior Citizens (NCSC) ngayong Huwebes na ang increase para sa buwanang social pension ng mga indigent senior citizens ay maaaring ipatupad early next year pa.

"Ang effectivity natin is 2023 kasi we are in the middle of the year, hindi naman puwedeng lumabas agad ‘yung pera kung walang budget. Kung lalabas naman, dapat may budgetary process ‘yan which Congress will have to approve,” ayon kay NCSC chief Franklin Quijano sa isang public briefing.

Aniya, ang measure na layong itaas ang monthly social pension ng mga indigent senior citizens mula P500 na maging P1,000 ay nag-lapse na into law.

“Nakikita natin na ang time where it would be effective would be January of 2023, hopefully, we’re keeping our fingers crossed na ma-approve ng ating legislative mill ‘yung budget ng 2023,” wika ni Quijano.

Sinabi ni Quijano na napakahalaga ng nasabing development dahil mabebenepisyuhan aniya dito ang tinatayang 4.1 milyong senior citizens sa buong bansa.

Ayon sa opisyal, ang kanilang opisina ay nakikipag-ugnayan na sa Department of Social Welfare and Development (DSWD) para sa implementasyon ng pension hike, habang ani Quijano, ang budget na kakailanganin para rito ay maaaring umabot sa halagang P50 bilyon.

“We are preparing and readiness is also defined in terms of the transition. Ang trabaho ngayon ay nasa DSWD pa lang and our memorandum of agreement says that ‘yung readiness na ‘yan ay may timeline,” saad ni Quijano.

“Malaking budget ito, it’s going to be P50 billion, from P500 to P1,000, it's going to be P50 billion from the original P25 billion. Tayo po ay nakipag-ugnayan with DSWD and we hope mapadali natin ito,” sabi pa niya.