P14B pondo sa pension ng military retirees, ini-release na – DBM

ni Lolet Abania | January 13, 2023

Ipinahayag ng Department of Budget and Management (DBM) ngayong Biyernes na aprubado na ang pag-release ng mahigit P14 billion para pondohan ang regular pension requirements ng mga military retirees.

Sa isang statement ng DBM, inaprubahan ni DBM Secretary Amenah Pangandaman noong Enero 12, ang Special Allotment Release Order (SARO) na nagkakahalaga ng P14,025,351,666 para sa Department of National Defense-Armed Forces of the Philippines (AFP).

Batay sa DBM, sakop ng SARO at kanilang kaukulang Notice of Cash Allocation (NCA) ang mga pension requirements mula Enero hanggang Marso 2023.

Ayon kay Pangandaman, ang napapanahong pagre-release ng pondo para sa pension requirements ng mga military retirees ay isa sa mga inisyatiba ng gobyerno upang kilalanin ang kanilang mahalagang tungkulin kaugnay sa seguridad at katatagan ng bansa, kung saan aniya ay nananatiling prayoridad ng administrasyong Marcos.

“It is our responsibility to make sure that our retirees, as well as their families, always get the benefits entitled to them,” sabi ni Pangandaman.

“This is the least we can do to show them our sincerest gratitude and respect,” dagdag niya.

Ayon sa DBM, “The fund is chargeable against the Pension and Gratuity Fund (PGF) under the 2023 General Appropriations Act (GAA).”

Base sa AFP payroll records noong Disyembre 31, 2022, anang ahensiya mayroong 137,649 pensioners na covered ng monthly pension requirement para sa unang quarter ng 2023.