P-Du30, bumisita sakay ng chopper… GLAIZA: CAGAYAN, AYUDA ANG KAILANGAN, 'DI PATANAW-TANAW LANG

ni Ador V. Saluta - @Adore Me! | November 17, 2020

May mensaheng nais iparating ang aktres na si Glaiza de Castro kay Pangulong Rodrigo Duterte. Kaugnay ito ng aerial inspection ng pangulo sa buong Tuguegarao City sa Cagayan nitong November 15 dahil sa malawakang baha na nangyari dulot ng Bagyong Ulysses.

Kasama ng pangulo sa kanyang aerial inspection si Senator Bong Go, dating special assistant to the president.

Kalakip ng mensahe ni Glaiza ang screen shot ng report ng CNN Philippines. Nais ipunto ni Glaiza na ayuda ang kailangan ng mga nasalanta ng bagyo at hindi lang ang pagtanaw sa kanila mula sa himpapawid (sakay ng chopper) dahil sa kanilang dinanas na kalamidad.

“'Yung may nakita ka nang mali pero nag-inspect ka lang,” tweet ni Glaiza sa Twitter.

Nakalagay sa caption ng CNN news: “LOOK: President Duterte conducts an aerial inspection in typhoon-hit Cagayan Valley. Cagayan has been placed under a state of calamity due to devastating floods which local officials described as the worst in the province's history.”

Hindi na nagbigay ng detalye si Glaiza tungkol sa kanyang maikling tweet, pero umani ito ng iba't ibang reaksiyon mula sa mga netizens.

May mga sumang-ayon at nakuha kaagad ang mensaheng nais sabihin ng aktres. Pero tulad ng inaasahan, kagaya ng ibang mga celebrities na naghahayag ng opinyon laban sa pamahalaan, labis na naapektuhan at minasama ito ng mga Duterte supporters. Nakatikim ng bashing ang aktres mula sa mga DDS.