P-BBM, binati si Concepcion sa matagumpay na expanded entrepreneur mentoring program

ni Fely Ng - @Bulgarific | July 2, 2022

Hello, Bulgarians! Nagpahayag ng suporta si President Ferdinand “Bongbong” Marcos, Jr. sa pagbibigay ng karagdagang tulong sa MSMEs sa bansa sa paglulunsad ng expanded entrepreneurship mentoring program, 3M on Wheels, na ginanap noong Hunyo 25 sa Atrium The Block sa SM City North EDSA, Quezon City.

Sa kanyang mensahe kay Go Negosyo founder Joey Concepcion, sinabi ng President na marami pa ang maaaring gawin para matulungan ang maliliit na negosyante ng bansa. “The MSMES right now are slowly coming back but still need as much help as we can give them, I really hope that in the next few years, we will be able to come into partnership and do what we can in what you have been advocating for so many years,” sabi niya habang binabati si Concepcion.

Ang 3M on Wheels ay nabuo mula sa Mentor Me on Wheels ng Go Negosyo, ang pinakamatagumpay na on-ground, nationwide mentoring program. Ang expanded mentoring program, ani Concepcion ay sumasalamin sa mas malawak na saklaw ng entrepreneurship mentoring na inaalok nito ngayon sa mga aspiring entrepreneur. Ang kaganapan ay masayang tinanggap ng maraming naghahangad na mga negosyante. “Na-overwhelm kami sa suporta. Humihingi ako ng paumanhin sa mga hindi namin na-accommodate, ngunit makatitiyak na babalik kami na may higit pang 3M on Wheels,” sabi niya.

Ang pre-recorded message ni President Marcos ay naihatid sa libu-libong naghahangad na mga negosyante, na nakibahagi sa libreng serbisyo ng mentoring ng mga batikang negosyante.

Dumalo rin sa naturang event si Quezon City Mayor Joy Belmonte, na naghayag ng ilang mga hakbangin ng lungsod upang matulungan ang mga MSME, tulad ng digitalization sa proseso ng pagpaparehistro ng negosyo, gayundin ang pagbibigay ng Php1 milyong startup capital sa maliliit na negosyo sa lungsod.

Ang pagpapalit ng pangalan nito bilang 3M On Wheels - ang tatlong M para sa Mentorship, Money, at Market — ay sumasalamin sa pangkalahatang misyon nito na magbigay hindi lamang ng mentorship, kundi pati na rin ng access sa kapital at merkado. Ang tatlong M ay bumubuo sa pundasyon ng misyon ng Go Negosyo na isulong ang entrepreneurship sa mga Pilipino.

Bilang 3M On Wheels, ipinakilala nito sa mga dumalo ang iba’t ibang aspeto ng halaga sa entrepreneurship, tulad ng pag-access sa capacity-building, tulong-pinansyal at market opportunities. Ang on-site na mentorship ng Go Negosyo Mentors ay nagbibigay ng one-on-one coaching at nagbabahagi ng kanilang sariling karanasan sa negosyo.

Magkakaroon ng Money and Market Booths para ipakilala ang mga negosyante sa mga small-business lending. Ang mga espesyalista sa iba’t ibang marketing channel ay handang magbigay ng mga solusyon sa lahat mula sa pagtatatag ng mga physical store, digital platform, logistics solution at digital payment platform.

Ang 3M on Wheels ay inaasahang ilalabas sa iba pang urban area sa buong Pilipinas sa huling bahagi ng taong ito.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.