Opisyal ng Pharmally, Michael Yang, pinondohan ang 2022 campaign ni VP Sara — Madriaga

ni Lester Bautista @News | April 15, 2026

Naging emosyonal at naiyak si Ramil Madriaga habang binabasa ang bahagi ng kanyang sinumpaang salaysay sa pagdinig ng House Committee on Justice kaugnay ng impeachment complaints laban kay VP Sara Duterte. (Jeff Tumbado)

Pinondohan ang kampanya?

Ibinulgar ng self-confessed na bagman umano ni Vice President Sara Duterte na si Ramil Madriaga na pinondohan umano ng isang financial officer ng Pharmally Pharmaceuticals at ng businessman na si Michael Yang ang kampanya ng Bise Presidente noong 2022.

Ayon kay Madriaga, taong 2020 nang utusan siya ni dating Pangulong Rodrigo Duterte na buuin ang Social Justice, Innovation, and Progress Pilipinas o ISIP Pilipinas, Inc., na nangangahulugan din umano na "Inday Sara is my President" para sa mga tagasuporta ni VP Sara.

Sinabi rin nito na ang pondo para sa ISIP ay nagmula sa mga aniya’y mga kaibigan at tagasuporta ng dating pangulo, kabilang si Lin Wei Xiong, na tinukoy niya bilang financial officer ng Pharmally, na naging kontrobersyal dahil sa bilyun-bilyong government contracts noong COVID-19 pandemic.

Aabot umano sa P175 milyon ang natanggap mula kay Lin para sa organizing efforts, promotional, at campaign activities ng ISIP.

“The money was placed inside several large backpacks and bags… Lin Wei Xiong was present when I received the said amount together with two other individuals,” ani Madriaga.

Bukod kay Lin, inutusan din umano siya ng dating pangulo na kumuha ng P100 milyon mula kay Maestrado Lim, isang dayuhang negosyante na nakilala niya sa Davao City. Nagbigay din daw ng “financial support” sa ISIP si Michael Yang, dating economic adviser ni dating Pangulong Duterte.