Opinyon ng mga eksperto, ‘wag isnabin

ni Ryan Sison - @Boses | March 13, 2022

Hindi pa handa ang Pilipinas na mailagay sa Alert Level 0.

Ito ang sinabi ng isang infectious disease expert kaugnay sa pag-aaral sa posibilidad na ibaba pa sa Alert Level 0 status ang bansa kung magpapatuloy pa ang pagbaba ng daily COVID-19 cases.

Paliwanag ng eksperto, mismong World Health Organization (WHO) ang nagsabi na walang bansa na dapat maiwan sa pagluluwag, gayung may mga bansa na mataas pa rin ang bilang ng COVID-19 cases.

Giit pa nito, matapos magluwag ng pamahalaan sa mobility restrictions, bumaba naman ang bilang ng mga indibidwal na sumasailalim sa tests. Ibig sabihin aniya, mayroong COVID-19 cases na hindi na nakukumpirma dahil hindi na nasusuri sa pamamagitan ng confirmatory tests.

Habang pinag-aaralan pa ng mga eksperto at gobyerno, sana’y maging mas maingat tayo.

Nauunawaan nating nais nang maibalik sa normal ang ating pamumuhay, pero pakiusap sa mga kinauukulan, hinay-hinay lang sa pagluluwag dahil marami pang dapat bantayan at pag-aralan. Kabilang na r’yan ang mga sitwasyon sa pagamutan. Kung magkakaroon ng COVID-19 surge, gaano tayo ka-tiyak na kakayanin ng health work force ang sitwasyon?

Hindi naman tayo nagiging nega, nais lang nating makasigurado na wala tayong magiging maling desisyon, lalo pa’t unti-unti na tayong nakakabawi makalipas ang halos dalawang taon.

Kaya ang suhestiyon natin, obserbahan muna nang maigi ang mga pagbabagong dulot ng pagpapatupad ng Alert Level 1 kahit wala pang nakikitang pagtaas ng bilang ng COVID-19 sa mga lugar kung saan ito umiiral.

Isa pang pakiusap, ‘wag nating isnabin ang opinyon ng mga eksperto. Sila ang katuwang natin upang patuloy na labanan ang pandemyang ito.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com